Հայտնի ֆրանսահայ երգիչ եւ Շվեցարիայում Հայաստանի նորանշանակ դեսպան Շառլ Ազնավուրը իտալական հեռուստաընկերության եթերում Թուրքիայից հողային պահանջներով է հանդես եկել, տեղեկացնում է թուրքական Hurriyet-ը։

Համերգների համար Իտալիայում գտնվող հանրահռչակ հայազգի երգիչը իտալական RAI 3 հեռուստաընկերության եթերում իր գոհունակությունն է հայտնել հոկտեմբերի 10-ին Ցյուրիխում ստորագրված հայ-թուրքական արձանագրությունների հետ կապված եւ ավելացրել. «1924 թվականին՝ երբ ես ծնվեցի, հայերին խոսք էին տվել հողերը վերադարձնել, ինչը դեռ չի իրականացել։ Ես նորից 85 տարի չեմ կարող սպասել։ Ստալինը խոսք էր տվել, որ հայերին կվերադարձվի Էրզրումը, Երզնկան, Աղրըն, Սվասը (Սեբաստիա), Էլազըղը (Խարբերդ), Դիարբեքիրը (Տիգրանակերտ), Բիթլիսը, Սիիրթը, Մուշը, Վանը եւ Հաքքարին։ Սեւրի համաձայնագրով էլ „Վիլսոնի Հայաստանը“ կներառեր նաեւ Տրապիզոնի, Էրզրումի, Վանի եւ Բիթլիսի նահանգները», ասել է Ազնավուրը։