Ռուսաստանի եւ Վրաստանի միջեւ «Վերին Լարս» անցակետի բացումը տնտեսապես ձեռնտու է երկու կողմերի համար եւ որեւէ սպառնալիք չի հարուցում, հայտարարել է Վրաստանի ԱԳՆ ղեկավար Գրիգոլ Վաշաձեն: Նրա խոսքերով, ներկայումս այդ հարցում անմիջական բանակցություններ են ընթանում Ռուսաստանի հետ, իսկ հարցերը քննարկվում են Հայաստանի միջոցով:

«Վրացական կողմը խոսում է Հայաստանի՝ որպես միջնորդի հետ, իսկ Հայաստանը բանակցություններ է վարում Ռուսաստանի հետ: Մեկ հանդիպում է եղել, որը վերաբերել է զուտ տեխնիկական ասպեկտներին»,- Վաշաձեի խոսքերն է մեջբերել GHN:

Նախարարը նկատել է, թե այս փուլում կողմերից որեւէ մեկը հստակ պայմաններ չի դնում, նաեւ որեւէ պայմանավորվածություն չկա համաձայնագրի վերաբերյալ:

Ինչպես արդեն հայտնել է NEWS.am-ը, Վրաստանի նախագահ Միխայիլ Սահակաշվիլին մտադիր է Ազգային անվտանգության խորհրդի քննարկմանը ներկայացնել ռուս-վրացական սահմանի «Վերին Լարս» անցակետի բացման հարցը: Հիշեցնենք, որ «Վերին Լարս»-ով հաղորդակցությունը չի գործում 2006թ. հուլիսից: Ռուսական կողմը որպես սահմանի փակման պաշտոնական պատճառ է նշել անցակետի վերանորոգման անհրաժեշտությունը եւ ժամանակակից տեսքի բերելը: տարանցիկ ուղին փակվել է նաեւ Հայաստանի համար:

Մայիսին Վրաստանի ԱԳՆ-ն հայտարարեց, թե Մոսկվան պատրաստակամություն է հատնել բացել անցակետը, սակայն որեւէ կոնկրետ քայլ այդ ուղղությամբ չի կատարվել: