«Հիմա Ռուսաստանը իր հզորության գագաթնակետին չի գտնվում, ուստի ԼՂ հարցում հնարավոր փոփոխությունները կարող են լինել ոչ ի օգուտ Մոսկվայի»,- ադրբեջանական լրատվամիջոցներից մեկին տված հարցազրույցում ասել է Սանկտ-Պետերբուրգի ժամանակակից Մերձավոր Արեւելքի ուսումնասիրության Կենտրոնի վերլուծաբան Ալեքսանդր Սոտնիչենկոն՝ ի պատասխան հարցի, թե արդյոք իրականությանը համապատասխանում է տեսակետը, որ Ռուսաստանը շահագրգռված չէ ԼՂ խնդրի կարգավորմամբ: «Ակնհայտ է, որ Մոսկվան բախվում է որոշակի խնդիրների որպես տարածաշրջանային առաջնորդ, դրա համար էլ ռուսական վերնախավում բավական շատ մարդիկ հանդես են գալիս Ղարաբաղում „ստատուս քվո“-ն պահպանելու օգտին»,- ասել է նա:

Հարցին, թե արդյոք հնարավո՞ր է, որ Թուրքիան վավերացնի հայ-թուրքական արձանագրությունները, առանց ԼՂ հարցում որեւէ առաջընթացի, վերլուծաբանը պատասխանել է. «Այո, կարծում եմ Թուրքիան կգնա այդ քայլին: Դա ձեռնտու է թուրքական քաղաքականությանն ու տնտեսությանը: Սահմանների բացմամբ, Անկարան կարող է Երեւանի վրա ազդեցության նոր լծակներ ձեռք բերել»: