Բելառուսը երբեք չի օգտագործել ղարաբաղյան հակամարտության հարցը քաղաքականության մեջ եւ երբեք չի բարեկամացել մեկի հետ՝ մյուսի դեմ, «այդ պատճառով էլ այդ հարցը մեզ համար ցավոտ է»: Այդ մասին հայտարարել է Բելառուսի նախագահ Ալեքսանդր Լուկաշենկոն Trend News գործակալությանը տված հարցազրույցում:

«Որոշ հարցերում մենք չենք կարող հեռու մնալ շատ խնդիրներից, լինի դա Մերձդնեստրը, Ղրիմը կամ Լեռնային Ղարաբաղի հարցը: Ես հաճախ այդ խնդիրն ընկերաբար քննարկել եմ Ադրբեջանի եւ Հայաստանի նախկին եւ ներկա նախագահների հետ»,- հայտարարել է Լուկաշենկոն՝ նկատելով, թե չի խառնվել այն խնդիրներին եւ նրբերանգներին, որ «բազմաթիվ են այդ հիմնախնդրում»:

Ինչպես նշել է Բելառուսի նախագահը, ինքը հասկանում ,թե որքան ցավոտ ու կարեւոր է այդ հարցը թե՛ հայ, թե՛ ադբեջանցի ժողովրդի համար, եւ հույս է հայտնել, որ երկու նախագահները կկարողանան լուծել խնդիրը. «Դա „գորդյան հանգույց է“, որ պետք է քանդել»:

«Բայց պետք չէ հույս դնել ինչ-որ միջնորդների վրա։ Թեեւ կա ԵԱՀԿ Մինսկի խումբը, եւ եթե Մինսկը, որպես այդ խմբի ստեղծման կենտրոն կարող է այդ հարցում ինչ-որ բանով օգնել, մենք ուրախությամբ կանենք դա»,- ասել Լուկաշենկոն, համենայն դեպս հավելելով, որ միջնորդների ներգրավումը «միգուցե լավ է, բայց այս պարագայում պարտավորություններ, 3-րդ, 4-րդ, 5-րդ կողմերի կարծիքներ հաշվի առնելու վտանգ կա»:

Նրա խոսքերով, ցանկացած միջնորդական կողմ այս հարցում փորձելու է իր քաղաքականությունը առաջ տանել: Իսկ ղարաբաղյան հակամարտության կարգավորումը Բելառուսի առաջնորդը տեսնում է առաջին հերթին այնտեղ ապրող մարդկանց շահերի տեսանկյունից, «նրանք չեն կարող ապրել այդ իրավիճակում եւ պայմաններում: Իսկ լուծման ձեւաչափերը խելոք մարդիկ միշտ էլ կարող են գտնել: Ծայրահեղ դեպքում, պարտավոր են»:

«Այդ պատճառով էլ մենք աջակցում են գործընթացն այն ուղղությամբ, որ այդ հարցը պետք է լուծեն երկու պետությունները, երկու նախագահները, երկու ժողովուրդները: Նստեն, հասկանան իրար եւ լուծեն: Մարդիկ էլ միշտ երախտապարտ կլինեն»,- հավելել է Լուկաշենկոն:

Հիշեցնենք, որ Ադրբեջանի նախագահ Իլհամ Ալիեւը պատրաստվում է նոյեմբերի 12-ին պաշտոնական այցով ժամանել Մինսկ: