ԱՄՆ պետական դեպարտամենտը դադարեցրել է Ադրբեջանում ԱՄՆ դեսպանի պաշտոնում Մեթյու Բրայզայի թեկնածությունը հաստատելու ընթացակարգը: Այս մասին NEWS.am-ին հայտնի է դարձել ամերիկյան դիվանագիտական աղբյուրներից:

Հիշեցնենք, որ Մեթյու Բրայզան մինչեւ այս տարվա սեպտեմբեր զբաղեցնում էր ԵԱՀԿ Մինսկի խմբի ամերիկացի համանախագահի պաշտոնը եւ միաժամանակ ԱՄՆ պետքարտուղարի տեղակալի օգնականն էր: Ներկայումս ԱՄՆ պետքարտուղարի տեղակալի օգնականի պաշտոնը զբաղեցնում է Թինա Քեյդենաուն, իսկ Մինսկի խմբի համանախագահի պաշտոնը` Ռոբերտ Բրադկեն: Արդեն ամիսներ շարունակ լրատվամիջոցները հաղորդում էին, որ Բրայզան նշանակվելու է Ադրբեջանում ԱՄՆ դեսպան: Ինքը՝ Բրայզան, այս կապակցությամբ նշել էր, որ իրեն հարազատ է Հարավային Կովկասը եւ ինքը կողմ կլիներ աշխատել այստեղ:

Հիշեցնենք, նաեւ որ արդեն մոտ 4 ամիս է, որ Ադրբեջանում ԱՄՆ դեսպանի պաշտոնը թափուր է: Մեր աղբյուրները չեն նշում, թե նրա թեկնածությունը հաստատելու ընթացակարգն ինչու է դադարեցվել: