Հայաստանը բարձր է գնահատում Ֆրանսիայի` որպես ԵԱՀԿ Մինսկի խմբի համանախագահող երկրի, ջանքերը հակամարտությունը խաղաղ, բանակցային գործընթացով հանգուցալուծելու գործում: Այդ մասին նոյեմբերի 19-ին հայտարարել է ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը՝ Հայաստանում Ֆրանսիայի դեսպանության առաջին խորհրդական Քրիստիան Բեքի հետ հանդիպմանը:

Հայաստանի ԱԺ հասարակայնության հետ կապերի վարչությունից NEWS.am-ին հայտնում են, որ Նաիրա Զոհրաբյանը բարձր է գնահատել հայ-ֆրանսիական քաղաքական հարաբերությունները, ինչը հաշվի առնելով հույս է հայտնել, որ նման բարձր որակական հարաբերություններ կարող են հաստատվել նաեւ տնտեսական ոլորտում:

Մեկ անգամ եւս շեշտելով ԼՂ խնդրի կարգավորման հարցում Հայաստանի դիրքորոշումը՝ հանձնաժողովի նախագահը բարձր է գնահատել Ֆրանսիայի` որպես ԵԱՀԿ Մինսկի խմբի համանախագահող երկրի, ջանքերը հակամարտությունը խաղաղ բանակցային գործընթացով հանգուցալուծելու գործում: Խոսելով հայ-թուրքական հարաբերությունների մասին` հանձնաժողովի նախագահը կրկին անգամ վերահաստատել է, որ հայ-թուրքական առանց նախապայմանների հարաբերությունների կարգավորումը առանձին գործընթաց է եւ որեւէ աղերս չունի ԼՂ հարցի կարգավորման հետ, ինչը, ըստ հանձնաժողովի նախագահի, բազմիցս փաստել են նաեւ Մինսկի խմբի համանախագահները: Անդրադառնալով տարածաշրջանային համագործակցության հարցերին, Նաիրա Զոհրաբյանը հաստատեց, որ Հայաստանը հավատարիմ է որդեգրած քաղաքականությանը եւ կողմ է տարբեր խնդիրների շուրջ տարածաշրջանային համագործակցությանը, չնայած այն հանգամանքին, որ դրանք հետեւողականորեն խոչընդոտվում են հարեւան Ադրբեջանի կողմից: