Երեկ Ռումինիայում տեղի ունեցած նախագահական ընտրություններում, ըստ exit poll-երի արդյունքների, երկրորդ փուլ են անցել երկրի գործող նախագահ Տրայան Բասեսկուն եւ ընդդիմադիր Սոցիալ-դեմոկրատական կուսակցության ներկայացուցիչ Միրչա Ջոանեն, ովքեր ստացել են ընտրողների քվեների՝ համապատասխանաբար 33 եւ 31 տոկոսը:

Հանդես գալով իր նախընտրական շտաբում, Բասեսկուն գոհունակություն է հայտնել, որ «ռումինացիների մեծամասնությունը հանդես է եկել 300 հոգանոց միապալատ խորհրդարան ունենալու օգտին` 500 հոգանոց երկպալատ խորհրդարանի փոխարեն»: Հաղորդում է «ԻՏԱՌ-ՏԱՍՍ»-ը:

Մեկնաբանելով exit poll-ի արդյունքները, ըստ որոնց՝ երկրորդ փուլ են անցնում ինքն ու Միրչա Ջոանեն, Բասեսկուն կոչ է արել «սպասել ընտրությունների պաշտոնական արդյունքներին»:

Հիշեցնենք, որ նախագահի ընտրություններն ու խորհրդարանական բարեփոխումների վերաբերյալ հանրաքվեն տեղի են ունեցել երեկ` նոյեմբերի 22-ին: Նախագահի թեկնածու էր գրանցվել 12 հոգի: Նախագահական ընտրությունների երկրորդ փուլը կայանալու է դեկտեմբերի 6-ին:

Նշենք, որ ներկա պահին ամփոփվել է քվեաթերթիկների մոտ 50 տոկոսը, որոնց արդյունքները շատ չեն տարբերվում exit poll-ի արդյունքներից: Մասնավորապես, Տրայան Բասեսկուի օգտին քվեարկել են ընտրողների 32,8 տոկոսը, Միրչա Ջոանեի օգտին` 29,1 տոկոսը: