Կիպրոսի խորհրդարանի նախագահ եւ Կիպրոսի դեմոկրատական կուսակցության առաջնորդ (DIKO) Մարիոս Գարոյանը միջազգային հանրությանը կոչ է արել ճանաչել Օսմանյան կայսրությունում Հայոց ցեղասպանության փաստը, հայտնում է Financial Mirror-ը:

Պարբերականը մեջբերում է Գարոյանի խոսքերը. «Կարծում եմ՝ մեր պարտքն է վերահաստատել մեր անկասելի հավատը հրեշավոր հանցագործության միջազգային ճանաչման պայքարում: Մենք արդարություն ենք խնդրում ու պահանջում ենք պատմական արդարության վերականգնում, այլ ոչ թե կեղծարարություն: Թուրքիայի փորձերը՝ կարգավորել հարաբերությունները Հայաստանի հետ, իրականում արդարությունը ժխտելու ցանկություն են: Երկկողմ հարաբերությունների կարգավորման ստորագրված արձանագրությունները ոչ այլ ինչ են, քան փաստաթղթերի միջոցով պատմությունը կեղծելու փորձ»:

Թերթը նաեւ հայտնում է, որ "Մ. Գարոյանը զուգահեռներ է տարել՝ հայ ժողովրդի պայքարը համեմատելով այն պայքարի հետ, որ տանում են կիպրացիները՝ կղզու հյուսիսային հատվածի ազատագրման համար, որ շուրջ 3 տասնամյակ զավթված է թուրքական զորքերի կողմից: Խորհրդարանի նախագահը հայտնել է, «Արդարությունն ու ազատությունն այն ամենն է, ինչին մենք ձգտում ենք: Ինչ վերաբերում է կիպրական խնդրին, մենք նման որոշում ենք ուզում, որ լիովին կվերականգնի Կիպրոսի, նրա տարածքի ու մարդկանց միասնությունը»: