Կանադայի Քվեբեկ քաղաքի «Կապիտոլիում» սրահում հինգշաբթի նախատեսված Շառլ Ազնավուրի համերգը չի կայացել: Հանրահայտ շանսոնյեն բեմ է բարձրացել եւ թույլ ձայնով հայտարարել, որ ստիպված է համերգը տեղափոխել կիրակի:
Ինչպես տեղեկացնում է «Le Journal de Québec»-ը, 87-ամյա Ազնավուրը բեմ է դուրս եկել ուշացումով եւ էլեգանտորեն հայտարարելով նորությունը` հիասթափեցրել մոտ 1100 հանդիսատեսի, ովքեր սկզբում մտածել են, թե դա կատակ է:
Ազնավուրը ներողություն է խնդրել` բացատրելով, որ իր կարիերայի ընթացքում առաջին անգամ է մի իրավիճակում, երբ ստիպված է վերջին պահին հետաձգել համերգը:
«Ես պետք է կիրակի Քվեբեկից արդեն մեկնեի Լոս Անջելես` թոռնուհուս հարսանիքին: Սակայն որոշեցի, որ հարսանիքին ուշացած կգնամ` Քվեբեկում համերգ տալուց հետո»,-ասել է նա:
«Երբ նա հեռացավ բեմից, շատ տխրել էր: Հատկապես, որ դա իր սիրելի քաղաքում` Քվեբեկում է տեղի ունենում»,-ասել է շանսոնյեի պրոդյուսերը:
Երգչին այցելել է բժիշկը, դեղամիջոց նշանակել: «Սակայն, գիտեք, որ իմ տարիքում այն տոկունությունը չկա, ինչ 20 տարի առաջ»,- ասել է հանրահայտ շանսոնյեն «Կապիտոլիումի» բեմից:
Ակնկալվում էր, որ հայազգի երգիչը, ով երրորդ անգամ է հանդես գալիս «Կապիտոլիումում», 2 ժամ 15 րոպեանոց համերգ կտար առանց դադարի` կատարելով 28 երգ: