Ադրբեջանցի լրագրող եւ իրավապաշտպան Էյնուլա Ֆաթուլաեւը հայտարարվել է ՅՈՒՆԵՍԿՕ/Գիլյերմո Կանո համաշխարհային մրցանակի 2012թ. դափնեկիր տպագրության ազատության գործում ունեցած ավանդի համար: Նրա թեկնածությունն առաջարկել է միջազգային անկախ հանձնաժողովը, հաղորդում է ՅՈՒՆԵՍԿՕ-ի կայքը:
35-ամյա Էյնուլա Ֆաթուլաեւը ռուսալեզու «Իրական Ադրբեջան» անկախ շաբաթաթերթի եւ ադրբեջանալեզու «Գյունդելիկ Ադրբեջան» («Ամենօրյա Ադրբեջան») օրաթերթի հիմնադիրն ու նախկին գլխավոր խմբագիրն էր: 2007թ. դատապարտվելով բանտային կալանքի` նա 2011թ. մայիսի 26-ին ազատվել էր ներում շնորհելու մասին Ադրբեջանի նախագահի հրամանագրով:
2011թ. հուլիսին պ-ն Ֆաթուլաեւը հիմնել է «Հանուն մարդու իրավունքների» ոչ կառավարական իրավապաշտպան կազմակերպությունը:
1997թ.-ին ՅՈՒՆԵՍԿՕ-ի գործադիր խորհրդի որոշմամբ ամրագրված ՅՈՒՆԵՍԿՕ/Գիլյերմո Կանո համաշխարհային մրցանակը տպագրության ազատության գործում ունեցած ավանդի համար ամեն տարի շնորհվում է Տպագրության ազատության համաշխարհային օրվա կապակցությամբ, մայիսի 3-ին: Դրան արժանանում են առանձին անձինք կամ կազմակերպություններ, որոնք աշխարհի տարբեր երկրներում ավանդ են ունեցել խոսքի ազատության պաշտպանության գործում, հատկապես եթե այն կապված է եղել կյանքի սպառնալիքի հետ: