Ցեղասպանություն բառը համապատասխանում է հայերի դեմ տեղի ունեցած ոճիրը բնութագրելու համար։ Այդ մասին հայտարարել է Ուրուգվայի արտաքին հարաբերությունների նախարար Լուիս Ալմագրոն Հայոց ցեղասպանության զոհերի հիշատակի օրը` ապրիլի 24-ին երկրի մայրաքաղաք Մոնտեվիդեոյի Արմենիա հրապարակում կայացած միջոցառման ժամանակ, հաղորդում է «Ազատությունը»:
Ուրուգվայահայ բազմամիութենական կազմակերպության կողմից կազմակերպված հանդիսության ժամանակ ելույթ ունենալով գործադիր իշխանության անունից` Ալմագրոն վերահաստատել է Հայոց ցեղասպանությունը դեռ 1965 թվականին աշխարհում առաջինը ճանաչած իր երկրի դիրքորոշումը։
Նախարարը կարեւորել է, որպեսզի վերջապես հաստատվի միջազգային մի դատարան` մարդկության դեմ այս հանցագործությունները դատապարտելու համար։ Նա դրական կարծիք է հայտնել ցեղասպանությունների ժխտման քաղաքականությունը օրենքների միջոցով սահմանափակելու հարցում։
Ալմագրոն ելույթի վերջում հայտնել է, որ առաջիկա շաբաթներին կատարելու է իր առաջին պաշտոնական այցելությունը Հայաստան։
«Ազատություն» ռադիոկայանի հետ զրույցում ուրուգվայցի նախարարը նշել է, որ հավանական է` Հայաստանում լինի մայիսի 5-6-ը։
