Վրաստանի հայ համայնքի 35 կազմակերպություններ` Թբիլիսիից, Սամցխե-Ջավախքից, Քվեմո-Քարթլիից, Աջարիայից, դիմել են երկրի նախագահ Միխայիլ Սահակաշվիլիին պատգամավոր Ազեր Սուլեյմանովի հակահայկական հայտարարությունների կապակցությամբ:
Ինչպես NEWS.am-ի թղթակցին հայտնել է «Հայարտուն» մշակույթի կենտրոնի համակարգող Լեւոն Չիդիլյանը, իրենց ուղերձում նրանք Սահակաշվիլիին խնդրել են դիտարկել կառավարող «Միացյալ ազգային շարժում» կուսակցությանը Ազեր Սուլեյմանովի անդամակցության նպատակահարմարության հարցը:
Մեկ այլ դիմում էր հղվել է խորհրդարանի նախագահ Դավիթ Բաքրաձեին` Սուլեյմանովի դեմ քրեական օրենսգրքով նախատեսված միջոցառումներ ձեռնարկելու խնդրանքով: Լեւոն Չիդիլյանի խոսքով, պաշտոնյաների կողմից առայժմ արձագանք չկա:
Ինչպես արդեն նշել է NEWS.am-ը, ապրիլի 24-ին խորհրդարանի նիստում Ջոնդի Բահատուրիան անդրադարձել էր նաեւ Հայոց ցեղասպանության հարցին: Մառնեուլի շրջանից ընտրված պատգամավոր Ազեր Սուլեյմանովը ռասիստական արտահայտություններ է արել հայերի հասցեին եւ վիճել վրացի պատգամավորի հետ:
Վրաստանի մարդու իրավունքների պաշտպանը եւս իր վրդովմունքն է հայտնել Սուլեյմանովի պահվածքից: