Բրյուսելում, ապրիլի 26-27-ին, տեղի է ունեցել Հայաստանի եւ Եվրամիության միջեւ մուտքի արտոնագրերի տրամադրման դյուրացման եւ առանց թույլտվության բնակվող անձանց հետընդունման /ռեադմիսիայի/ շուրջ համաձայնագրերի բանակցությունների երկրորդ փուլը: Հայկական պատվիրակությունը գլխավորում էր ՀՀ արտաքին գործերի նախարարի տեղակալ Զոհրաբ Մնացականյանը:
ԱԳՆ մամուլի ծառայությունից NEWS.am-ին հայտնում են, որ մուտքի վիզաների դյուրացման համաձայնագրով ՀՀ քաղաքացիների համար կնախատեսվեն Շենգենյան գոտու երկրներ մուտքի արտոնագրեր ստանալու դյուրացված ընթացակարգեր: Համաձայնագրով սահմանվում է, որ Հայաստանի գիտնականները, ուսանողները, լրագրողները, գործարարները, սպորտի եւ արվեստի գործիչները եւ այլք վիզա կարող են ստանալ պարզեցված կարգով: Նախատեսվում է նաեւ նվազեցնել Շենգենի մուտքի արտոնագրերի գինը եւ դյուրացնել ընթացակարգերը:
Մուտքի արտոնագրերի դյուրացման համաձայնագրին զուգահեռ Հայաստանի եւ ԵՄ միջեւ բանակցվում է նաեւ հետընդունման մասին համաձայնագիր, որով կարգավորվելու են ԵՄ եւ Հայաստանի տարածքում առանց թույլտվության բնակվող անձանց վերադարձի եւ հետընդունման հարցերը:
Բանակցությունների ընթացքում երկուստեք գոհունակությամբ նշվել է, որ կողմերի միջեւ արդյունավետ աշխատանքի արդյունքում լավ առաջընթաց է գրանցվել փետրվարից մեկնարկած գործընթացում, ինչի հետեւանքով հնարավոր կլինի մոտ ապագայում ավարտին մոտեցնել բանակցությունները:
Բանակցությունների հաջորդ փուլը նախատեսվում է Երեւանում հունիսին:
