Նիգերիական Կանո քաղաքի համալսարանի վրա հարձակման հետեւանքով զոհվածների թիվը հասել է 21 մարդու, հաղորդում է AP-ը:
Ավելի վաղ նիգերիական Կարմիր խաչի ներկայացուցիչը հայտնել էր 16 զոհվածների մասին:
Ինչպես ավելի վաղ հայտնել էր NEWS.am-ը, Կանո քաղաքի Բաուերո համալսարանի կամպուսում ապրիլի 29-ի առավոտյան 3 պայթյուն էր տեղի ունեցել: Պայթուցիկ սարքերը գտնվել են կաթոլիկական եկեղեցուց ոչ հեռու, որտեղ այդ պահին կիրակնօրյա ժամերգություն էր տեղի ունենում: Անմիջապես պայթյուններից հետո եկեղեցու կողմից լսվել են ինքնաձիգների կրակահերթերի ձայներ:
Դեպքի վայր ժամանած ոստիկանության աշխատակիցները եւ զինվորականները շրջապատել են համալսարանի շենքը, սակայն բոլոր հարձակվողներին հաջողվել է փախչել: Բազմաթիվ վիրավորներ տեղափոխվել են տեղական հիվանդանոցներ:
Կանոյում ահաբեկչության պատասխանատվությունն իր վրա դեռեւս ոչ ոք չի վերցրել, սակայն բոլոր մանրամասները մատնանշում են «Բոքո Հարամ» ծայրահեղականների մասնակցությունը: