Ֆրանսիայի հայկական կազմակերպությունների համակարգող խորհրդի Ազգային խորհրդի նախագահ Ալեքսիս Գովջյանին եւ համակարգող խորհրդի համանախագահ Արա Թորանյանին հղած երկու առանձին նամակներում Ֆրանսիայի նախագահ եւ նախագահի թեկնածու Նիկոլա Սարկոզին հաստատել է իր հավատարմությունը Հայոց ցեղասպանության ժխտումը քրեականացնող նոր օրինագիծ շրջանառության մեջ դնելու հարցում: Այդ մասին հայտնում է Nouvelles d`Arménie-ն:
Ֆրանսիայի նախագահի նամակում, մասնավորապես, ասվում է.
«Ապրիլի 24-ին ես ներկա էի Հայոց ցեղասպանության 97-ամյակին նվիրված միջոցառմանը: Ես ուրախ էի հանդիպելու ձեզ հետ այդ կապակցությամբ եւ եւս մեկ անգամ շնորհակալություն եմ հայտնում հրավերի համար:
Ինչպես ես արդեն ասել եմ Երեւանում, որտեղ դուք ինձ ուղեկցում էիք պետական այցի ընթացքում, ապա Արսեն Չաքարյանին Պատվո լեգեոնի շքանշան հանձնելիս, որ հայ ժողովուրդը դարձել է ամբողջ ազգի ոչնչացման առաջին ծրագրված արշավի զոհը: Հայ փախստականները մեր երկրում դարձել են հավատարիմ որդիներ եւ շատ բան են տվել:
Ֆրանսիայի համար պատիվ է ընդունել հետապնդվող հայերին: Այսօր մեր երկիրը պատիվ ունի պայքարել ցեղասպանության ճանաչման համար:
Այդ արարողությունը թույլ է տվել մեզ հիշեցնել մեր հանդիսավոր պարտավորության մասին, անցկացնել օրենք, որ պաշտպանում է ցեղասպանության ճանաչումը եւ քրեականացնում է ժխտումը: Հարգելով Սահմանադրական խորհրդի որոշումը` ես, այդուհանդերձ, ուզում են, որ նոր տեքստը խորհրդարան մտցվի արդեն հունիսին: Վստահ եղեք, որ Ֆրանսիայի անունից ես կշարունակեմ պայքարը արդարության եւ ճշմարտության ճանաչման համար»:
Ֆրանսիայի նախագահի թեկնածուներ Նիկոլա Սարկոզին եւ Ֆրանսուա Օլանդը վերահաստատել էին իրենց պատրաստակամությունը` արագորեն ընդունել Հայոց ցեղասպանության ժխտումը քրեականացնող նոր օրինագիծ:
«Ես պարտավորություն եմ վերցրել եւ կկատարեմ այն: Դա իմ պարտականությունն է որպես հանրապետության նախագահ` պաշտպանել ֆրանսիական քաղաքացիներին, որոնց ժխտում է սպառնում»,- ասել էր Նիկոլա Սարկոզին եւ հավելել. «Կառավարությունն արդեն աշխատում է նոր օրինագծի վրա… Տեքստը կարող է ընդունվել խորհրդարանի լիազորությունների հաջորդ ժամկետի սկզբին»: Նա նշել է, որ հաշվի են առնվելու Սահմանադրական խորհրդի որոշումը:
Նրա մրցակիցը` Սոցիալիստական կուսակցության թեկնածու Ֆրանսուա Օլանդը հաստատել էր, որ իրականում ցանկանում է «ժամկետի սկզբում, հանգիստ պայմաններում իրակաանցնել ցեղասպանության ժխտման քրեականացումը»:
«Ես համոզված եմ, որ դա պետության պարտքն է` ճանաչել ցեղասպանությունները, որոնք ապացուցված են պատմական հետազոտություններով, իսկ ժխտումը բռնության դրսեւորում է, որ տեղ չունի մեր հանրապետությունում»,- նշել էր նա:
Ինչպես ավելի վաղ հայտնել էր NEWS.am-ը, փետրվարի 28-ին Ֆրանսիայի Սահմանադրական խորհուրդը ցեղասպանությունների, այդ թվում նաեւ Հայոց ցեղասպանության, ժխտման քրեականացման մասին օրենքը հայտարարել էր ոչ սահմանադրական:
Նշենք, որ ցեղասպանությունների ժխտման քրեականացման օրենքը, որը հայտնի է որպես Բուայեի օրենքն ընդունվել էր Ֆրանսիայի Ազգային ժողովի կողմից դեկտեմբերի 22-ին, իսկ այնուհետեւ վավերացվել Սենատում հունվարի 23-ին:
Մի խումբ ֆրանսիացի սենատորներ բողոքարկել էին այն Սահմանադրական խորհրդում, որն էլ հակասահմանադրական էր ճանաչել: