Հայաստանում մայիսի 6-ի խորհրդարանական ընտրություններին դիտորդական առաքելություն են իրականացնում տեղական 53 կազմակերպություններից 31 418 դիտորդներ, ինչպես նաեւ 11 միջազգային տարբեր կազմակերպությունների եւ դեսպանությունների Երեւանում հավատարմագրված 647 ներկայացուցիչներ:
Այդ մասին հաղորդվում է Հայաստանի Կենտրոնական ընտրական հանձնաժողովի պաշտոնական կայքում:
Եվրոպայի խորհրդի խորհրդարանական վեհաժողովի (ԵԽԽՎ) 37 դիտորդներից կազմված պատվիրակությունը գլխավորում է բարոնուհի Էմմա Նիքոլսոնը (Մեծ Բրիտանիա): ԵՍՀԿ խորհրդարանական վեհաժողովի, Եվրախորհրդարանի եւ ԵԱՀԿ/ԺՀՄԻԳ 258 դիտորդներից կազմված պատվիրակությունը գլխավորում է Ռադմիլա Շեկերինսկայան:
ԱՊՀ-ի դիտորտական առաքելությունը, որի կազմում կան 151 դիտորդներ, գլխավորում է ԱՊՀ-ի Գործադիր կոմիտեի նախագահի առաջին տեղակալ Վլադիմիր Գարկունը եւ ԱՊՀ երկրների դիարկող առաքելության շտաբի ղեկավար Եվգենի Սլոբոդան: Բացի դրանից ընտրություններին կհետեւեն ԱՊՀ երկրների Միջխորհրդարանական վեհաժողովից 22 դիտորդներ, 69 դիտորդներ ԵԱՀԿ Խորհրդարանական վեհաժողովից, 20 դիտորդներ Ընտրական համակարգերի միջազգային փորձագիտական կենտրոնից (ICES), 16` ՍԻԼԲԱ կազմակերպությունից, 12` Եվրախորհրդարանից, 3` ընտրական համակարգերի Միջազգային հիմնադրամից (IFES), 35 դիտորդներ Հայաստանում գտնվող դիվանագիտական առաքելություններից եւ եւս 24 դիտորդներ, որոնք համարվում են ԿԸՀ-ի արտասահմանյան պետությունների ներկայացուցիչներ: