Ֆրանսիայի արտգործնախարար Լորան Ֆաբիուսը ֆրանսիական Le Monde թերթին հարցազրույց է տվել` շոշափելով միջազգային օրակարգի տարբեր հարցեր, խոսելով նաեւ Թուրքիայի հետ հարաբերությունների եւ Հայոց ցեղասպանության ժխտումը քրեականացնող օրինագծի վերաբերյալ:
Թղթակցի այն հարցին, թե ինչպե՞ս պետք է վերականգնեն Թուրքիայի հետ հարաբերությունները, որոնք սրվել են ցեղասպանությունների ժխտումը քրեականացնող օրինագծի հետ կապված, Ֆրանսիայի ԱԳՆ-ի ղեկավարը հայտարարել է. «Դա հեշտ չէ: Մենք շատ լավ հանդիպում ունեցանք նախագահ Գյուլի հետ Չիկագոյում: Ինչ վերաբերում է հայկական հարցին, մենք պետք է հաշվի առնենք Սահմանադրական խորհրդի որոշումը»:
Լրագրողը նկատել է, որ Ֆրանսիայի նորընտիր նախագահ Ֆրանսուա Օլանդը պարտավորվել է արագ ձեռնամուխ լինել այդ օրենքի ընդունմանը: Ի պատասխան Ֆաբիուսն ասել է. «Այո: Այնուամենայնիվ, գոյություն ունեն իրավաբանական սահմանափակումներ:
Ամեն դեպքում կարեւոր է վերականգնել Թուրքիայի հետ հարաբերությունները, որը կարեւոր դեր է խաղում տնտեսական եւ դիվանագիտական ոլորտում, օրինակ` սիրիական եւ իրանական հարցերում»:
