Օքսֆորդի հանալսարանի բնական պատմության թանգարանի աշխատակից, դոկտոր Ադրիան Պոնտը նամակ է գրել բրիտանական «The Independent»-ին` պատմելով Հայաստան կատարած այցելության եւ հայ-ադրբեջանական սահմանում իրավիճակի մասին, ինչպես նաեւ հույս հայտնելով, որ Լեռնային Ղարաբաղի ժողովրդի ժողովրդավարական ընտրությունն, ի վերջո, կհաղթանակի:
Բրիտանացի գիտնականը մասնավորապես գրել է.
«Եվրատեսելի» պատճառով առաջացած հիստերիայի ֆոնին մենք չպետք է տեսադաշտից դուրս թողնենք Ադրբեջանի ագրեսիվ վերաբերմունքը հարեւան Հայաստանի նկատմամբ:
Անցած շաբաթ հայ գործընկերների հետ համատեղ գիտական աշխատանքի շրջանակում ես եղա Հայաստանի հյուսիսում, Ադրբեջանի սահմանամերձ տարածքներում: Գյուղերից մեկում մարդիկ տներից դուրս եկան, որպեսզի մեզ խորհուրդ տան ճանապարհը չշարունակել, քանի որ ադրբեջանցի դիպուկահարները պարբերաբար կրակում են: Իրենց այգիներում խաղաղ աշխատող մի քանի մարդիկ եւ նույնիսկ դպրոցականներ գնդակոծվել են: Նման դեպքերը լայնորեն տարածված են:
Նման սպանությունների նպատակը կարող է լինել միայն հայկական կողմից վրեժխնդրություն հրահրելը, ստեղծել «սահմանային միջադեպ» եւ Ադրբեջանին թույլ տալ փորձել բռնակցել Հայաստանի եւս մեկ լեռնային անկլավ:
Հայաստանի այդ հատվածում բնակավում են էթնիկ հայեր, նրանք քրիստոնյաներ են եւ խոսում են հայերեն: Նրանք չէին ցանկանա լինել իսլամական Ադրբեջանի կազմում, որտեղ հետապնդումների կենթարկվեն: Հուսանք, որ ժողովրդավարական ընտրությունն ու իրավունքի գերակայությունը կհաղթանակի»: