Հայաստանի գլխավոր դատախազ Աղվան Հովսեփյանը եւ ՉԺՀ գլխավոր դատախազ Ցաո Ձյանմինը հունիսի 11-ին՝ Երեւանում, ստորագրել են «2012-2013թթ. ընթացքում ՀՀ գլխավոր դատախազության եւ ՉԺՀ գլխավոր դատախազության միջեւ համագործակցության» ծրագիր:
Ըստ այդմ՝ կողմերը պայմանավորվել են կազմակերպել համատեղ սեմինարներ, կլոր-սեղաններ՝ քննարկելու առանձին հանցատեսակների քննության առանձնահատկություններին վերաբերող հարցեր՝ նախանշելով միջոցառումների կոնկրետ ժամանակացույց:
Ծրագրի համաձայն՝ 2012-2013թթ. հայ եւ չինացի գործընկերները համատեղ սեմինարներ կկազմակերպեն հետեւյալ թեմաներով.
-Հանցավոր նպատակներով ինտերնետն օգտագործելու դեմ պայքարի հիմնախնդիրները եւ պրակտիկան. դատախազության դերը կիբերհանցագործութան դեմ պայքարում իրավապահ մարմինների գործողությունների համակարգման հարցում,
-Կոռուպցիոն բնույթի հանցագործությունների դեմ պայքարում փորձի փոխանակում. պրակտիկայի, պայքարի արդյունքների եւ արդյունավետության վերաբերյալ քննարկումներ,
-Տնտեսական հանցագործությունների քննության պրակտիկան եւ խնդիրները:
Կողմերը հույս են հայտնել, որ ստորագրված ծրագիրը նոր որակ կհաղորդի Հայաստանի եւ Չինաստանի դատախազությունների համագործակցությանը՝ նպաստելով հանցավորության դեմ պայքարում դատախազական հսկողության արդյունավետության բարձրացմանը:
Ծրագիրը երկրորդ փաստաթուղթն է, որը ստորագրվում է երկու երկրների գլխավոր դատախազների կողմից: Առաջին փաստաթուղթը՝ Հայաստանի գլխավոր դատախազության եւ Չինաստանի գերագույն Ժողովրդական դատախազության միջեւ համագործակցության մասին Համաձայնագիրը, ստորագրվել է 1999 թվականի սեպտեմբերի 9-ին՝ Պեկինում:
ՉԺՀ գլխավոր դատախազ Ցաո Ձյանմինի գլխավորած պատվիրակությունը Երեւան է ժամանել հունիսի 9-ին՝ ՀՀ գլխավոր դատախազ Աղվան Հովսեփյանի հրավերով: Այցելության ընթացքում հյուրերը հնարավորություն են ունեցել ծանոթանալու Հայաստանի դատախազության համակարգին, հիմնական գործառույթներին եւ խնդիրներին, քննարկվել են նաեւ քրեական գործերով իրավական օգնություն ցուցաբերելու վերաբերյալ հարցեր:
Պատվիրակությունն այցելել է Հայաստանի պատմամշակութային հուշարձաններ՝ ծանոթանալով հայոց պատմությանն ու մշակույթին, իսկ հունիսի 12-ին հյուրերը կայցելեն Ծիծեռնակաբերդ եւ Հայոց Ցեղասպանության թանգարան` հարգելու Մեծ Եղեռնի անմեղ զոհերի հիշատակը:
ՀՀ դատախազությունը կարեւորում է հանցավորության դեմ պայքարում միջազգային համագործակցությունը եւ ի լրումն միջազգային փաստաթղթերով` կոնվենցիաներով նախատեսված համագործակցության սկզբունքների, գործնական քայլեր է ձեռնարկում նաեւ քրեական գործերով իրավական օգնություն ցուցաբերելու վերաբերյալ այլ պետությունների դատախազությունների հետ երկկողմանի համագործակցությունը զարգացնելու ուղղությամբ: Արդեն 14 երկրների դատախազությունների հետ Հայաստանն ունի ստորագրված համագործակցության մասին հուշագրեր, իսկ 2 երկրի հետ առավել զարգացնելով համագործակցության մեխանիզմները` նաեւ՝ համագործակցության ծրագիր: Մինչ այս Հայաստանը համագործակցության ծրագիր` միջոցառումների ժամանակացույցի եւ թեմաների հստակեցմամբ, ստորագրել էր Ռուսաստանի դատախազության հետ: