Ներկայումս ադրբեջանական կողմի հետ ակտիվ բանակցություններ են վարվում երրորդ երկրում Հայաստանի եւ Ադրբեջանի գերիների, պատանդների եւ անհետ կորածների հարցերով հանձնաժողովների ներկայացուցիչների հանդիպում կազմակերպելու վերաբերյալ: Այս մասին NEWS.am-ին ասաց Գերիների, պատանդների եւ անհետ կորածների հանձնաժողովի աշխատանքային խմբի ղեկավար Արմեն Կապրիելյանը: Բանակցությունները վարվում են Կարմիր Խաչի միջազգային կոմիտեի միջնորդությամբ:
«Ցավոք, առայժմ դրան ավելացնելու ոչինչ չկա»,- նշեց աշխատանքային խմբի ղեկավարը: Նրա խոսքով, վերջին տարիներին միայն նման մեկ հանդիպում է կայացել: «Իմ պրակտիկայում նման առաջին եւ վերջին հանդիպումը տեղի է ունեցել 2006թ. Բրյուսելում, ԿԽՄԿ հովանու ներքո, իմ եւ Ադրբեջանի պետհանձնաժողովի աշխատանքային խմբի ղեկավարի միջեւ»,-նշեց Արմեն Կապրիելյանը:
Նրա խոսքով` նշված հանդիպման ժամանակ որոշ աշխատանքային հարցեր են քննարկվել. «Այդ պահին մեզ համար ամենահրատապը տեղեկատվության փոխանակումն էր եւ երկուստեք հարցումների կատարումը: Թվում է, պայմանավորվածություն է ձեռք բերվել այն մասին, որ ոչ մի հարցում չպետք է անպատասխան մնա, եւ կողմերը պարտավորվել են ժամանակին կատարել միմյանց հարցումները եւ տեղեկատվություն փոխանակել, որոնք վերաբերում են անհայտ կորածներին եւ ռազմագերիներին»: Բայց, ցավոք, ադրբեջանական կողմից տվյալ պայմանավորվածություններն այդպես էլ ի գիտություն չընդունվեցին եւ ստանձնած պարտավորությունները չկատարվեցին, նշեց նա: