Ադրբեջանի առաջին նախագահ, Սոցիալ-դեմոկրատական կուսակցության համանախագահ Այազ Մութալիբովը որոշել է հեռանալ կուսակցությունից եւ ավարտել իր քաղաքական գործունեությունը:
Իր որոշման մասին նա նամակով տեղեկացրել է հունիսի 30-ին Բաքվում կայացած կուսակցության համագումարի ժամանակ: Նա իր հեռացումը բացատրել է ընտանիքին ու առողջությանն ավելի մեծ ուշադրություն դարձնելու հանգամանքով:
Միաժամանակ` երկար տարիներ Մոսկվայում բնակվող նախկին նախագահը հայրենիք վերադառնալու ցանկություն է հայտնել:
Ադրբեջանում վերջերս ընդունվել է «Նախկին նախագահների կարգավիճակի մասին» օրենքը, որի համաձայն պետության նախկին ղեկավարներն անձեռնմխելիություն են ստանում քրեական հետապնդումից: Այդ օրենքը Մութալիբովին հնարավորություն է տալիս վերադառնալ:
Նա Ադրբեջանի առաջին նախագահ է ընտրվել 1991թ. սեպտեմբերին եւ պաշտոնավարել մինչեւ 1992թ. մարտը, երբ հրաժարական էր տվել Ազգային ճակատի ճնշման ներքո:
Ադրբեջանում նրա նկատմամբ քրեական գործեր են հարուցվել` կապված 1990թ. հունվարի 20-ի իրադարձությունների, ինչպես նաւ հեղաշրջման փորձերի հետ: