Հայաստանի գյուղատնտեսության նախարար Սերգո Կարապետյանն այսօր` հուլիսի 13-ին, աշխատանքային այցով մեկնել է Գեղարքունիքի մարզ` տեղում ծանոթանալու ոլորտի հիմնախնդիրներին եւ բերքահավաքի աշխատանքներին: Այս մասին NEWS.am-ին հայտնեցին Գյուղատնտեսության նախարարությունից:
Նախարարը նշել է, որ 5 համայնքներում ( Գեղամավան, Չկալովկա, Շորժա, Մադինա եւ Վարդաձոր) արոտավայրերի ջրարբիացման եւ գյուղատնտեսական տեխնիկայի տրամադրման գործընթացներն արդեն ավարտական փուլում են, իսկ վեցերորդ՝ Խաչաղբյուր համայնքում, ծրագիրը նոր է մեկնարկել եւ ներկայումս ընթացքի մեջ է կառավարման պլանի մշակումը: Նախարարը կարեւորել է նաեւ կաթ վերամշակողների եւ կաթ արտադրողների միություններ ստեղծելու գործոնը, ինչը մեծապես պետք է նպաստի ֆերմերների եւ վերամշակողների հարաբերությունների կանոնակարգմանը, ապահովի կաթի մթերման խելամիտ գների ձեւավորումը եւ արտադրվող ու մթերվող ծավալների զգալի աճը: ‹‹2011 թվականի համեմատությամբ 2012-ին մարզում հացահատիկի եւ հատիկաընդեղեն մշակաբույսերի ցանքերն ավելացել են 7344 հեկտարով: 1500 հա-ով ավելացել են կարտոֆիլի ցանքերը: Մարզի հողօգտագործողներին մատչելի գներով՝ մեկ պարկը 6000 դրամով , տրամադրվել է 3610 տոննա ազոտական պարարտանյութ: Մեկ այլ ծրագրով՝ մարզը մատչելի գներով ստացել է նաեւ 2700 տոննա դիզելային վառելանյութ››,- նշել է նախարարը:
Օրվա երկրորդ կեսին մարզպետի հետ Սերգո Կարապետյանը եղել է Մարտունու տարածաշրջանի Վարդենիկ համայնքի հացահատիկի արտերում, ուր առանձին գյուղացիներ դժգոհել են սպասվող բերքից, կապելով այն սերմացուի որակի հետ: Զրույցի ընթացքում շոշափվել են նաեւ առաջիկա բերքահավաքի կազմակերպման եւ աշնանացան ցորենի որակյալ սերմացուով ապահովվածության հարցեր: Այցելության վերջին կանգառը Մեծ Մասրիկն էր, ուր քննարկվել է համայնքը գյուղատնտեսական ռեսուրսների կառավարման եւ մրցունակության ծրագրում ընդգրկելու հարցը: Առաջիկայում այստեղ կկազմակերպվի արոտօգտագործողների կոոպերացիա,որը ձեռնամուխ կլինի համայնքի վարչական տարածքում գտնվող արոտավայրերի բարելամանն ու ջրարբիացմանը:
