«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք «Հայ ազգային կոնգրես» խմբակցության պատգամավոր, նախկին վարչապետ Հրանտ Բագրատյանի հետ:

Ո՞վ եք դուք եւ ինչպիսի՞ն եք:

Ինչ-որ տեղ ես նախեւառաջ գիտելիքի գերի եմ, դա ինձ խանգարում է, իմ մեջ գերակայում է ռացիոնալը, տրամաբանությունը, դա նույնպես չափազանց է: Բայց երբ ես հանդիպում եմ սովորական մարդկային խնդիրների, ինձ թվում է, որ ես դառնում եմ շատ պարզ:

Կյանքը:

Կյանքը միակ բանն է, որ տրվում է մարդուն, անդրշիրիմյան կյանք չկա: Կյանքը կարճ է, մի փորձեք այն երկարացնել, ի վերջո` ինչքան էլ այն տեւի, մեկ է` մի ակնթարթ է եւ քեզանից մնում է երկու բան` գործերը եւ երեխաները:

Առանց ինչի՞ չեք պատկերացնում ձեր կյանքը:

Իմ կյանքը չեմ պատկերացնում առանց սիրո, երեխաների եւ «տնտեսական բարեփոխումների»:

Ի՞նչն է ձեզ ուրախացնում եւ տխրեցնում:

Երկուսի աղբյուրն էլ մեր ժողովուրդն է, ուրախացնում է, որ ինքն այդքան յուրահատուկ է, լավն է, տխրեցնում է, որովհետեւ այս պահի դրությամբ շատ հետամնաց է:

Ո՞րն է ձեր ամենուժեղ կողմը:

Իմ ամենաուժեղ եւ թույլ կողմը տրամաբանությամբ ցանկացած բանի հասնելու կարողությունն է, որն իմ մեջ առաջացնում է անսահման համառություն:

Ամենալավ եւ վատ հիշողությունները:

Ամենավատ հիշողություններ չունեմ, հուսով եմ` չեմ ունենա, դրանք կարող են լինել ավելի շատ անձնական, օրինակ` ընկերներիս եւ հարազատներիս մահվան դեպքերը, այլ տեսակի վատ հիշողություններն իմ վեջը չեն, ինձ չես կարող ավելի կոփել: Վատ բաներ շատ եմ տեսել, դրանք հիշողությանս մեջ չեն մնացել: Ինչ-որ տեղ արդեն 13-14 տարեկանից սկսած` ամեն օրն ինձ համար լավ հիշողություն է:

Դուք ձեզ երջանիկ զգո՞ւմ եք:

Այո, ես չեմ կարողանում ինձ որսալ երջանկությունից դուրս, ես գտնվում եմ պերմանենտ երջանկության մեջ:

Երջանկության ձեր բանաձեւը:

Հետաքրքրությունը, ամեն ինչ հետաքրքիր է, ճշմարտությունն այնքան շերտեր ունի:

Չիրականացված երազանքներ ունե՞ք:

Ես  ուզում եմ Հայաստանը լինի այնպես, ինչպիսին ես եմ պատկերացնում:

Պաշտոնները…

Պաշտոնն ինձ համար գաղափարներս իրացնելու միջոց է:

Ծխախոտ, խմիչք եւ մոլախաղեր:

Չեմ ծխում, գրեթե չեմ խմում, բայց Կոնյակի գործարանում աշխատելու շնորհիվ հոտով կարող եմ ջոկել, թե կոնյակը քանի տարեկան է: Երբեք չեմ խաղացել, մի անգամ ինձ տարան Լաս Վեգաս, հայկական համայնքն ինձ հրավիրել էր Լոս Անջելես, ձեւի համար մտել եմ կազինո, ինչ-որ ավտոմատ էր, խաղադրույք արեցի ու 500 դոլար շահեցի, դա տվեցի նրան, ով ինձ հրավիրել էր:

Ինչի՞ց եք վախենում:

Վախենում եմ ծուլությունից, դավաճանությունից եւ երկերեսանիությունից:

Ինչի՞ց եք նյարդայնանում:

Շանտաժից եւ ցինիզմից:

Ինչի՞ց եք հոգնում:

Համառությունից, հոգնում եմ, որ դա իմ նկատմամբ է լինում:

Ի՞նչ կփոխեիք ձեր մեջ:

Շատ հաճախ անտեղի էմոցիաներ եմ ցուցաբերում, որից ոչինչ չի փոխվելու: Եթե ես կարողանայի իմ կյանքում փոխել այդ գիծը, ես կարծում եմ, որ ավելի բարձր դիրքերի կհասնեի:

Ի՞նչն է կյանքում կարեւոր ձեր համար:

Ինձ համար կարեւոր է այն, որ դիմացինիդ անձնական վատություն չանես, իսկ լավություն անելիս էլ պետք է մտածել:

Սխալ արարքներ եւ ասածներ եղե՞լ են:

Արածներիս մեջ 50 տոկոսը սխալ է եղել, դա վատ ցուցանիշ չէ:

Ամենախենթ եւ ռոմանտիկ քայլը:

Շատ են եղել, օրինակ` հացի գնի ազատականացումը: Ամբողջ կյանքս խենթություն էր էլի, օրինակ` ամուսնանալս: Ես իրեն 2 էի նշանակել, դասախոսն էի, ու այդպես  ամուսնացանք: Ռոմանտիկ քայլեր, երբ սեր եմ բացատրել:

Ներողություն խնդրո՞ւմ եք:

Դժվար, բայց խնդրում եմ:

Հպարտությունը:

Ես ուզում եմ, որ իմ հպարտության առարկան հայ մարդը լինի, հիմա նա չէ: Ես ուզում եմ հասկանալ` այս տեսակի առաքելությունը որն է, եթե ճիշտ տեսակ է, ինքը կմնա, այլապես կվերանա:

Հրանտ Բագրատյանը` խոհանոցում:

Վերջին 3-4 տարում նման դեպքեր լինում են, ես կարողանում եմ եփել ոչխարի մսով լավ ամառային ճաշ, խաշլամա:

Ձեր մասին ամենաանհեթեթ առասպելը:

Մազութի գործ անելը, որը ընդհանրապես չի եղել:

Ամուսնությունը եւ սերը կապ ունե՞ն իրար հետ:

Հա, իհարկե, եթե սեր չկա, ինչ երեխա պետք է ծնվի:

Ընտանիքը:

Ընտանիքը ինձ համար շատ մեծ բան է, բայց ես հասկանում եմ, որ դա միակողմանի է, իմ տղայի համար իր ընտանիքն է կարեւոր, դժբախտաբար, երեխաները վաղ թե ուշ այդ ընտանիքն իրենցը չեն համարելու:

Երեխաները:

Երեխաները եւս գործ են, ստեղծագործություն, նախեւառաջ ինձնից կմնան իմ գրքերը, մասնավորապես` իմ ցիկլային եւ մեգաէկոնոմիկայի տեսությունները,  երեխաները, ինչպես նաեւ հայկական տնտեսական բարեփոխումները (ՀԲ-ի բնորոշմամբ լավագույնը հետխորհրդային տարածքներում), ինչպես նաեւ պատերազմի հաղթական ավարտը 1993-1994թթ։ Փորձում եմ առանց անմիջականորեն կպնելու երեխաներիս ազատությանը` նրանց դարձնել շարունակող: Հաճելի է մտածել, որ քո մահից հետո քո բջիջները, արյունը ուրիշի մեջ կապրեն:

Կանայք:

 Սուտ է, թե նրանք խելք չունեն, խելոք են, սուտ է, թե գեղեցիկ չեն, գեղեցիկ են, սուտ է, թե զգացմունքային են,  ռացիոնալ են, ազնվությամբ աշխատանքի մեջ գերազանցում են տղամարդկանց, ես սիրում եմ ինձ շրջապատել կանանցով շատ պատասխանատու գործերում:

Ձեր կյանքի սերերը:

Ես այդտեղ պետք է խոսեմ իմ կնոջ մասին: Ես ափսոսում եմ, որ մենք երրորդ երեխան չունեցանք: Սերն այնպիսի բան է, որ նյութական է, մնացածը ինչ եղել է իմ կյանքում, նույնիսկ ինձ համար գաղտնիք է:

Ի՞նչ կցանկանայիք:

Ես շատ կցանկանայի, որ ինչ-որ մեկն ինձ սիրեր եւ ես չպատասխանեի այդ սիրուն:

Նշենք, որ Հրանտ Բագրատյանը եւս Ազգային ժողովում նորաբնակներից է: Տնտեսագետ-ճարտարագետ, տնտեսագիտության դոկտոր, պրոֆեսոր Հրանտ Բագրատյանը աշխատել է Հայաստանի վարչապետ, Արժույթի միջազգային հիմնադրամում որպես խորհրդական, Երեւանի կոնյակի գործարանի փոխնախագահ եւ մարդկային ռեսուրսների ու խաղողի գնումների գծով տնօրեն: Դասավանդել է մի շարք համալսարաններում: «Ազատության» կուսակցության նախագահն է, պատգամավոր է ընտրվել ՀԱԿ համամասնական ցուցակով:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի,Լեւոն Մարտիրոսյանի, Նաիրա Կարապետյանի, Հայկ Գրիգորյանի, ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի, ՀԱԿ-ից Լյուդմիլա Սարգսյանի, «Ժառանգությունից»` Ռուբեն Հակոբյանի հետ:

Շարքը` Ինգա Մարտինյանի