Նախօրեին Յուրմալայում մեկնարկած, երիտասարդ կատարողների «Նոր ալիք-2012» միջազգային երաժշտական մրցույթի առաջին մրցութային օրը հայտարարված է համաշխարհային հիթի օր:
Այսօր` հուլիսի 25-ին, մրցույթի մասնակիցները կկատարեն համաշխարհային հիթերի իրենց տարբերակները: Հիշեցնենք, որ Հայաստանը մրցույթում ներկայացնում է Սուրեն Առուստամյանը, ով կներկայացնի Էրիք Քլեփթոնի Change The World հիթը:
Մրցույթի մասնակիցների ելույթից առաջ հայտնի հիթերը կկատարեն երգիչներ Ալսուն, Տիմատին, Լարիսա Դոլինան, Տիմուր Ռոդրիգեսը, Իրինա Դուբցովան: Երեկոյի հատուկ հյուրն է 1980-ականների անգլիացի հայտնի փոփ երգիչ Ռիք Էսթլին:
Առաջին մրցութային համերգը կվարեն Վլադիմիր Զելենսկին, Սերգեյ Զվերեւը, Լերա Կուդրյավցեւան եւ Սերգեյ Լազարեւը:
Ժյուրիի անփոփոխ համանխագահներն են Իգոր Կրուտոյը եւ Ռայմոնդ Պաուլսը:
«Նոր ալիք 2012»-ի ժյուրիի կազմում ընդգրկվել են երգահան Իգոր Նիկոլաեւը, երգչուհի Լայմա Վայկուլեն, երգչուհի Վալերիան, երգիչներ Լեոնիդ Ագուտինը եւ Վալերի Մելաձեն, երգահան եւ պրոդյուսեր Կոնստանտին Մելաձեն, Իգոր Մատվիենկոն:
Մրցույթը Յուրմալայում մեկնարկել է հուլիսի 24-ի երեկոյան եւ կշարունակի մինչեւ հուլիսի 29-ը:
Նախօրեին տեղի բնակիչները փառատոնի հյուրերին դիմավորում էին փուչիկներով, շարված «կարմիր գորգի» երկայնքով, որով անցել են Իոսիֆ Կոբզոնը, «Քոմեդիի» նախագահ Ալեքսանդր Րեւան, դերասանուհի Աննա Սեմենովիչը, ոճաբան Սերգեյ Զվերեւը:
Մնացած հյուրերը եւ ժյուրիի անդամները հանդիսավոր անցումն արհամարհել են, հայտնում է «ՌԻԱ Նովոստին»:
Համերգը բացել է «Յուրմալա-1988»-ի հաղթող Ալեքսանդր Մալինինը` գնչուական երգչախմբի հետ «Երկար ճանապարհով» երգով:
Մրցույթին հաղթանակի համար պայքարում են 14 երկրների 16 մասնակիցներ, ովքեր մրցույթի բացումից մեկ օր առաջ, վիճակահանությամբ որոշել են, թե ով որ համարի ներքո է հանդես գալու:
Մրցույթի մասնակիցները հնարավորություն կստանան հանդես գալ հայտնի ռոքերներ Գարիկ Սուկաչեւի, «Մաշինա վրեմենի», «Ակվարիում» եւ «Չայֆ» խմբերի հետ միասին:
Հայաստանը ներկայացնող Սուրեն Առուստամյանը, վիճակահանության համաձայն, այսօր հանդես կգա 5-րդը, հուլիսի 26-ին` 10-րդը, հուլիսի 27-ին` 14-րդը:
Ավելի վաղ NEWS.am-ը հայտնել էր, որ առաջին մրցութային օրը Առուստամյանը կկատարի Էրիք Քլեփթոնի Change The World հիթը: Որպես հայրենի երկրի հիթ նա կներկայացնի «Իմ սերը քեզ» երգը, իսկ երրորդ մրցութային օրը Սուրենը կկատարի Բրենդոն Սթոունի Next to you երգը: