Իսպանիայի խորհրդարանում Հայոց ցեղասպանության հարցի հետ կապված քննարկումը հետաձգվել է` երկրում տնտեսական իրավիճակի հետ կապված: Այս մասին «Nouvelles d`Arménie» ամսագրին ասել է Բարսելոնի Հայ դատի հանձնախմբի ներկայացուցիչ Արմեն Սիրունյանը:
Սկզբում խորհրդակցություններ էին նախատեսվում հոկտեմբերին, սակայն տնտեսական իրավիճակով պայմանավորված` հարցը չլուծված է մնում:
«Այդուհանդերձ, Հայ դատի հանձնախումբը շարունակում է խորհրդարանականների հետ հանդիպումները եւ Հայոց ցեղասպանության ճանչման նոր նախաձեռնություններ է առաջարկում»,-ասել է Սիրունյանը:
«Իսպանացի պատգամավորները եւ լայն հանրությունը տեղյակ չեն այդ խնդրից, ուստի կոմիտեն փորձում է բացը լրացնել` լրագրողների հետ հանդիպումներ կազմակերպելով: Խնդիրներից մեկն էլ այն է, որ հայ համայնքը ցրված է ողջ երկրով մեկ եւ համախմբաված չէ` միասնաբար այդ խնդիրը լուծելու համար»,-նշել է նա:
