«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք «Ժառանգություն» խմբակցության պատգամավոր, «Ազատ դեմոկրատներ» կուսակցության անդամ, նախկին արտգործնախարար Ալեքսանդր Արզումանյանի հետ:

Ո՞վ եք դուք, պարոն Արզումանյան, եւ ինչպիսի՞ն եք:

Այնպիսին եմ, ինչպիսին ինձ տեսնում են:

Որտեղի՞ց եք գալիս եւ ո՞ւր եք գնում:

Գնում եմ դեպի ազատ, ժողովրդավարական, անկախ Հայաստանի կերտումը, դա իմ կյանքի վերջին 30 տարիների գործունեությունն է, գալիս եմ որտեղից որ բոլոր հայերն են գալիս` մեր անցյալից:

Ո՞րն է կյանքում ձեր առաքելությունը:

Լավ քաղաքացի լինել:

Կյանքի եւ մահվան հանդեպ ձեր վերաբերմունքը:

Փիլիսոփայական: Մեզ տրված է մի կյանք եւ պետք է փորձենք լավագույնս ապրել:

Սիրելի արտահայտություն:

Այդպիսի սլոգաններ չունեմ:

Մենախոսություն ձեր եւ ձեր միջեւ:

Յուրաքանչյուր մարդ էլ մենախոսում է, չեմ կարծում, որ դա հանրային քննարկման թեմա է:

Ինչպե՞ս ապրել, որ ճիշտ ապրել կամ ապրելու ձեր բանաձեւը:

Յուրաքանչյուր մարդ ինքն է որոշում իր ապրելաձեւը: Ըստ իս` պետք է ապրես այնպես, որ որդիներդ երբեւէ չամաչեն իրենց ծնողների արած քայլերի համար:

Ձեր ամենամեծ սուտը:

Դեռեւս առջեւում է:

Ինչի՞ մեջ եք ձեզ ամենից շատը մեղադրում:

Մեկ բան նշել դժվար է, հաճախ երբ հայացք ես նետում արարքներիդ վրա, գտնում ես, որ այս կամ այն հարցը կարելի էր այլ կերպ լուծել, այս կամ այն քայլը անել կամ չանել, փորձում եմ շատ մտորել այս թեմաներով, որպեսզի ապագայում չունենամ նման քայլեր:

Ձեր ամենաուժեղ եւ թույլ կողմերը:

Ես շատ շիտակ մարդ եմ եւ ասում եմ այն, ինչ մտածում եմ, շիտակությունը թերեւս ամենաուժեղ եւ ամենթույլ կողմն է:

Երջանկությունը ի՞նչ գույն ունի:

Սովետական միությունում կար համընդհանուր երջանկության գաղափարը, յուրաքանչյուր մարդ ունի երջանկության մասին իր պատկերացումը, ավելին` յուրաքանչյուր մարդ կյանքի տարբեր փուլերում տարբեր պատկերացումներ է ունենում երջանկության մասին: Ինձ համար դա պրոցես է` երջանկության ձգտումը:

Ո՞վ կամ ի՞նչը կարող է ձեզ ստիպել լռել:

Ոչ ոք:

Ձեր հպարտությունը:

Նորից օրիգինալ չեմ լինի, որդիս է:

Հոգսերը:

Հոգսերը շատ ավելի շատ են, քան մենք կցանկանայինք, պետք է ամեն ինչ անել, որ այդ հոգսերը թեթեւացնել:

Անցանկալի պարտականություններ:

Աշխատում եմ խուսափել անցանկալի պարտականություններից, փորձում եմ գտնել ռացիոնալ հիմք եւ պարտականությունն անցանկալի չհամարել:

Անպատասխանատու արարք կամ հայտարարություն:

Հավանաբար նման արարքներ արել եմ ուսանողական տարիներին:

Ո՞վ է ձեզ կյանքում հիասթափեցրել, անուններ կասեք:

Ոչ, անուններ չեմ ասի, բայց շատ շատերն են հիասթափեցրել ինձ:

Ի՞նչն է ձեզ հուսահատեցնում:

Սուտը, կեղծիքը, երեսպաշտությունը:

Ինչի՞ց եք զարմանում:

Ինձ դժվար է զարմացնել, երեւի երկար կյանք եմ ապրել, դրա համար:

Ի՞նչն է ձեզ հոգնեցնում:

Անիմաստ քննարկումները:

Ինչի՞ համար եք զղջում:

Շատ ու շատ բաներ կան, չի զղջում միայն հիմարը:

Ի՞նչ եք սիրում եւ ատում:

Ատելությունը ուժեղ եւ ծայրահեղական զգացում է, ես ծայրահեղություններ չեմ սիրում: Ատում է միայն շատ թույլ մարդը, ուժեղ մարդը չպետք է ատի:

Ի՞նչն է ձեզ ուրախացնում եւ տխրեցնում:

Կապված է ընտանիքիս, հարազատաներիս հետ, իմ ընտանիքի հետ կապված ցանկացած հաջողություն ինձ ուրախացնում է, ցանկացած անհաջողություն` տխրեցնում:

Ի՞նչ վտանգներ եք հաղթահարել:

Բազմաթիվ, ինչպես շատ շատերը, ես ապրել եմ Խորհրդային միությունում, մի երկրում, որտեղ ազատ միտք արտահայտելն այնքան էլ չի խրախուսվում, այդ ճանապարհը, ցավոք սրտի,  անցել եմ նաեւ անկախ Հայաստանում, որտեղ եւս մարդիկ կարող են հետապնդել ազատ խոսքի համար, շատ բաներ եմ հաղթահարել եւ դեռ վստահ եմ` հաղթահարելու եմ:

Ձեր կյանքի ամենակարեւոր հանդիպումը:

Ի պաշտոնե հարյուրավոր  կարեւոր հանդիպումներ ունեցել եմ բավական հետաքրքիր մարդկանց հետ, մեկնումեկը առանձնացնելը արդարացի չի լինի:

Ռիսկային քայլեր, խենթություններ:

Խենթություններ չեն անում շատ սահմանափակ մարդիկ: Կյանքի գեղեցկությունը, բերկրանքը գեղեցկությունը, խենթությունների մեջ է, աշխարհը զարգացել է հենց խենթերի շնորհիվ, այդ խենթերն են առաջ տանում աշխարհը, այնպես որ ես էլ իմ սահմանների մեջ ինչ-որ խենթություններ արել եմ: Բայց ամենամեծ խենթությունը դեռ առջեւում է:

Ինչպե՞ս եք վերաբերում ձեզ քննադատողներին:

Յուրաքանչյուր մարդ իրավունք ունի իր կարծիքն արտահայտելու, չեմ սիրում, որ զրպարտում են, ատում եմ բամբասանքները, սիրում եմ կշռադատված, փաստարկված քննադատություն, որին կարելի է փաստարկներով հակադարձել:

Թշնամիներ կամ հակառակորդներ ունե՞ք:

Ցանկացած մարդ, ով մտնում է քաղաքականություն, ունենում է բազմաթիվ հակառակորդներ, եթե իրենք թշնամական քալլերի են ձգտում, խրախուսելի չէ, բայց կյանք է, ամեն ինչ էլ կա:

Երբեւէ ձգտե՞լ եք նմանվել ինչ-որ մեկին:

Օրիգինալ չեմ լինի, եթե ասեմ, որ մանուկ ժամանակ ձգտել եմ նմանվել հորս:

Հայրական ապտակ ձեզ եւ ձեր կողմից:

Ճիշտն ասած` մայրական ապտակ ստացել եմ,  հայրական` ոչ: Ես էլ  որդուս  վրա երբեք ձեռք չեմ բարձրացրել: Կարծում եմ, որ խոսքը, օրինակը ամենաճիշտ սաստելու միջոցն է:

Ամենաթանկարժեք իրը, որ ունեք:

Բոլորվին նյութապաշտ չեմ, դրա համար այդ կատեգորիաներով չեմ առաջնորդվում:

Վերջին կարդացած գիրքը:

Շատ եմ կարդում, իմ սիրած գրողներից մեկը Ֆոլկներն է, որին պարբերաբար վերընթերցում եմ, իսկ այս պահին ընթերցում եմ ետպատերազմյան Եվրոպայի մասին գիրք:

Ամենառոմանտիկ օրը:

Այդպիսի մի օր նշել չեմ կարող: Երեւի էլի կապված կլինի ընտանիքիս հետ:

Առաջին սիրո խոստովանություն:

Դեռեւս 4-րդ դասարանում` դասընկերուհուս:

Անցած սերեր:

Անցած սերեր չեն լինում, սիրահարություններ են լինում:

Կանայք:

Ես գենդերային հավասարության կողմնակից եմ, տղամարդիկ եւ կանայք միմյանց հարստացնող, ուժեղացնող, լրացնող են, առանց մեկը մյուսի անհնար է պատկերացնել, այնպես որ այդ երկուսի ներդաշնակության մեջ է կյանքի ողջ բերկրանքը:

Ընտանիքը:

Ինչպես ասում էին Սովետական Միությունում, ընտանիքը հասարակության ամենակարեւոր բջիջն է:

Երեխաները:

Յուրաքանչյուր մարդու ցանկությունն է, որ հպարտանա իր երեխաներով եւ շատ բան կախված է, թե մարդ ինչպիսի դաստիարակություն կտա: Պետք է ձգտել ամեն ինչ անել, որպեսզի ապագայում հպարտանաս երեխաներով:

Ձեր ընտրյալը:

Հավանաբար կինս է:

Ասում են` տղամարդու սիրտ տանող ճանապարհը ստամոքսով է:

Ես ունեմ այդպիսի ծանոթներ, բայց ինքս, լինելով ասկետիկ կեցվածքով մարդ, այդքան մեծ նշանակություն չեմ տալիս:

Խոհանոցում պատրաստել գիտե՞ք:

Սովորել եմ Մոսկվայում եւ ապրել եմ հանկարացարանում, այնպես որ շատ լավ խոհարարական ձիրք ունեմ:

Չիրականացված երազանք:

Դա այն Հայաստանն է, որի համար պայքարել եմ:

Թե չլիներ կինն ու գինին, ի՞նչը կփրկեր կյանքում հերոսին:

Հերոս չէր լինի:

Ծխախոտ, խմիչք եւ կանայք:

Ծխում եմ, բայց հիմա ծխելու դադարեցնելու պրոցեսում եմ, առիթից առիթ խմում եմ, շատ կին ընկերներ ունեմ:

Եթե ոսկե ձկնիկ բռնեիք:

Ես այդ տարիքից դուրս եմ եկել, եւ հույս չունեմ, որ երբեւէ ոսկե ձկնիկ կբռնեմ:

Ինչ կցանկանաք ավելացնել:

Կցանկանայի գիտակցելով հանդերձ, որ շատ ծանր է կյանքը, շատ չհուսահատվենք, շատ ժողովուրդներ անցել են այս ճանապարհով, պետք է գիտակցենք, որ պետականության կառուցումը երկարաժամկետ պրոցես է եւ բոլորս պետք է միասին կերտենք մեր Հայաստանը եւ չփորձենք օտար ափերում երջանկություն որոնել:

Նշենք, որ Ալեքսանդր Արզումանյանը  ավարտել է Երեւանի պետական համալսարանի մեխանիկամաթեմատիկական ֆակուլտետը, աշխատել է ճարտարագետ-ծրագրավորող: Եղել է ԱՄՆ-ում ՀՀ արտակարգ եւ լիազոր դեսպան. ՄԱԿ-ում ՀՀ մշտական ներկայացուցիչ, իսկ 1996-1998թթ.` ՀՀ արտաքին գործերի նախարար: 1988թ-ից մասնակցել է Ղարաբաղյան շարժմանը, եղել է Հայոց համազգային շարժման վարչության նախագահ: Ամուսնացած է, ունի մեկ զավակ:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի, Վահե Էնֆիաջյանի, ՀԱԿ-ից Լյուդմիլա Սարգսյանի,  Հրանտ Բագրատյանի, «Ժառանգությունից»` Ռուբեն Հակոբյանի, Խաչատուր Քոքոբելյանի, ՀՅԴ-ից` Արծվիկ Մինասյանի հետ:

Շարքը` Ինգա Մարտինյանի