News
Լրահոս
News
Ուրբաթ
Մարտ 29
Տեսնել լրահոսը

«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք Հայ հեղափոխական դաշնակցություն խմբակցության քարտուղար Աղվան Վարդանյանի հետ:

Մեկ-երկու նախադասությամբ կբնութագրեք ձեզ:

Խաղաղ, երջանիկ  ճշգրիտ մարդ, ինչ  անում եմ, անում եմ սիրով եւ պատասխանատվությամբ:

Ժամանակը:

Մեզ տրված կյանքի սկիզբն ու վերջն է: ժամանակը մեր կյանքն է: Մեկ տարի առաջ իմ հրեշտակ տատիկը 99 տարեկան էր, հրեշտակ թոռնիկս` 3 տարեկան. Այսքան անվերջ է մեր ժամանակը:

Ճակատագիր կա՞, թե մարդը ինքն է կերտում կյանքը:

Ճակատագիր կա, բայց  մարդն ինքն է իր կյանքն ապրում եւ ստեղծում կամ ոչնչացնում տրվածը:

Ի՞նչը չեք սիրում ձեր մեջ:

Որոշակի տարիքից հետո այդ ամենը դառնում է երկրորդական, անիմաստ է: Ինչ կամ` կամ:

Ձեր առանձնահատկություն ո՞րն է:

Բնույթով ծույլ  եմ, իսկ ծուլությունը տաղանդի նշան է,  բայց երբ կա հստակ խնդիր եւ նպատակ, դառնում եմ մեքենա, գիշեր-ցերեկ հետեւողական աշխատում եմ: Կարողանում եմ խնդիրներ ձեւակերպել եւ որոշումներ կայացնել:

Ամենակարեւոր սկզբունքները, որ երբեւէ չեք դավաճանել:

Արժանավոր, տաղանդավոր մարդկանց կողքին լինել: Մարդու միջավայրը իր հարստությունն է: Այդ իմաստով բացառիկ բախտավոր  եմ: Ընկերություն եմ արել  Համո Սահյանի, Վահագն Դավթյանի, Հրանտ Մաթեւոսյանի, Ալեքսեյ Կիրակոսյանի հետ: Այսօր  Տիգրան Մանսուրյանը, Սոս  Սարգսյանն են, իմ սերնդի տասնյակ տաղանդավոր մարդիկ: Կյանք եմ ապրել Վազգեն Սարգսյանի, Վանո Սիրադեղյանի հետ:

Ձեր գործունեության մեջ ե՞րբ եք ձեզ «ձուկը ջրում զգում»:

Երբ գիշեր-ցերեկ բանում եմ, երբ գիտեմ, որ արածս արդյունավորվում է: Բոլոր փուլերում էլ ադպիսի ժամանակ եղել է: Լավագույնը բանաստեղծություն գրելու տարիներն են:

Դավաճանված լինելու զգացողություն ունեցե՞լ եք:

Թերեւս, բայց կյանքն ամենամեծ արժեքն է,  ամեն բան էլ  կպատահի: Ես սովոր եմ խաղաղ, հանգիստ, փիլիսոփայորեն նայել ամեն ինչի:

Ուրախությունը ո՞նց է դրսեւորվում ձեզ մոտ:

Բարձր, անհոդաբաշխ ծիծաղով, ընկերներիս հետ կյանք ապրելով:

Իսկ տխրությունը:

Չեմ տխրում կամ ինչ-որ  տարիքից հետո զվարթ տխրություն է: 

Անհաջողությունները ո՞նց եք հաղթահարում:

Սիրով:

Հուսահատվու՞մ եք:

Ոչ, գուցե շատ կարճ` մի քանի  րոպե:

Ո՞վ է ձեզ հիասթափեցրել եւ դուք ո՞ւմ եք հիասթափեցրել:

Ո՞ւմ եմ  հիասթափեցրել. վստահ եմ`  շատերին:  Հիասթափվում ես, երբ մարդուց ավելին ես  ակնկալել, բայց նա այդ չի եղել, չի կարողացել լինել:

Դուք Ձեզ ո՞նց եք վերաբերում:

Հանգիստ, խաղաղ, գիտեմ իմ  թերություն-թուլությունները, առավելությունները: Ամբողջական եմ:

Ինքներդ ձեզ  հետ հաճա՞խ եք առանձնանում:

Միշտ առանձին եմ: Բացառությամբ, երբ նույնանում ես:

Թուլություններից խոսեցիք, ո՞րն են ձեր թուլությունները:

Հազարի  մեջ որն ասեմ: Թուլություն-առավելություն հաճախ նույնանում են: Ֆրանսիացի բանաստեղծի տողով` «ես ամեն ինչ տեսա` միրգ, կին եւ անապատ»:

Ի՞նչն է ձեզ ձանձրացնում:

Այլեւս ոչ մի բան, գուցե` տափակությունը: Կյանքը ձանձրալի չի լինում:

Ի՞նչն է ձեզ հունից հանում:

Ոչ մի բան:

Բարկացած ժամանակ ի՞նչ եք անում` գոռգոռալ, ձեռքը խփել սեղանին եւ այլն:

Չէ, խաղաղ եմ. եթե մարդն ապուշ է` ապուշ է. չի փոխվելու: Ինչ իմաստ նրանով զբաղվել: Փակում եմ իր էջը, ինձ համար գոյություն չունի: Վերջերս մեր քաղաքական գործիչներից  մեկի հետ այդպես էլ վարվել եմ:

Ատելի մարդիկ ունե՞ք:

Ատելություն, չարություն, նենգություն. չկայացած մարդկանց զբաղմունք է:

Երբ ստում եք կամ խաբում  ինչ-որ մեկին,  ի՞նչ է փոխվում ձեր մեջ:

Փորձառությունը մարդուն սովորեցնում է ոչ թե սուտ ասել, այլ ասել ճշմարտությունը` ընդամենը  մեկ-երկու դետալ  փոխելով: Կարծես ամբողջը ճիշտ ես ասել, բայց լրիվ այլ պատկեր է ստացվում: Թերեւս փոքրիկ մեղքի քաղցր զգացողություն է մնում:

Ձեր ամենամեծ մեղքը ո՞րն է:

Ժամանակը շատ բան սրբում-մաքրում է: Վստահ եմ ` կան մարդիկ,  ում հետ կյանքի այս կամ այն փուլում ճիշտ չեմ վարվել: Մեծ մեղք  չեմ համարում: Կյանքը կյանք է:

Ձեր ապրած կյանքում ամենանշանակալի բանը ո՞րն է:

Ասացի`  բախտավոր մարդ եմ.  Նախիջեւան, 7-8 տարեկանում,  մեր գյուղի սալքարերին պառկած, տեսել եմ` ինչպես է երկրագունդը պտտվում: Մի քանի ճշմարիտ բանաստեղծություն եմ գրել: Ինձնից շատերն են գոհ, քչերն են դժգոհ: Սիրել եմ ու սիրվել: Հպարտ եմ, որ արդեն 20 եւ ավելի տարի, իբրեւ պարզ կուսակցական, Հայաստանում Դաշնակցության ճշմարիտ արժեհամակարգի արմատավորման, իբրեւ պետական-քաղաքական գործիչ` անկախ պետականության կայացման մասնակիցն եմ եղել:

Այս պահի դրությամբ ի՞նչ չլուծված հոգսեր ունեք:

Կիսատ մնացած առանձնատունս ավարտել, ինձ համար կարեւոր մարդկանց կողքին լինել:

Երջանկությունը ո՞ւմ դեմքով կամ տեսքով է ձեզ այցելում:

Կյանքի:

Անընդհատ ծխում եք, է՞լ ինչն է ձեզ գրավում:

25 տարի առաջ բժիշկն ասաց`  քո թոքերով ծխելը մահացու է: Սխալվում էր: Ընկերներիս հետ լինել, լիարժեք կյանքով ապրել:

Իսկ կանա՞յք:

Կանանց մասին ամեն ինչ հնարավոր չէ ասել, կիսատ ասել` չի կարելի. everything or nothing:

Առաջին սիրո խոստովանություն:

1-ին  դասարանում, 4-րդ դասարանում, 7-րդ դասարանում:

Ձեր կյանքի սերերը:

Եղել են: Մեկ, երկու, երեք...հըմմմ (հաշվում է)

Ընտանիքը:

Երկու հրաշալի զավակ, երեք սքանչելի թոռնիկ ունեմ, լավ կին,  հարս ու փեսա:

Հոբբիներ:

Շախմատ,  թղթախաղ, գրականությունը հիմա կարող եմ արդեն հոբբի համարել:

Կազինո այցելե՞լ եք եւ ամենաշատը ինչքա՞ն գումար եք պարտվել

Եղել է: Մոլի խաղացող չեմ, ինձ համար խաղը հենց խաղ է, 300-500 դոլար շահել կամ տարվել եմ:

Ամենաթանկարժեք իրը, որ ունեք:

Նկարներ:

Փողը, հարստությունը, շքեղությունը. Երբեւէ նման բաներից նեղվե՞լ եք, կամ ասում են` դրանք փչացնում են մարդուն, ձեր վրա զգացե՞լ եք:

Ինձ սովորեցրել են.  ինչքան ասես` չկա, այնքան չի լինի, միշտ գոհացիր եղածով: Կամ այնքան չեմ ունեցել, որ փչացնի, կամ ինձ վրա չի ազդում:

Վերջին կարդացած գիրքը կհիշեք:

«Չինական մեծ փոփոխությունների գիրքը«: Պարբերաբար վերընթերցում եմ Բրոդսկու հարցազրույցները, Բորխեսի պատմվածքները, Չարենց, Հրանտ Մաթեւոսյան:

Ի՞նչը կփրկեր կյանքում հերոսին, թե չլիներ կինն ու գինին:

Հերոսը  դատապարտված է, հերոսին ոչ մի բան չի փրկի:

Մի անգամ...

Ինչո՞ւ մի անգամ, ամեն անգամ կյանքը հրաշալի է:

Նշենք, որ Աղվան Վարդանյանն ավարտել է  Երեւանի պետական համալսարանը, բանասեր է, բանաստեղծ, լրագրող: Աշխատել է մի շարք լրատվամիջոցներում, այդ թվում` «Երկիր» օրաթերթի գլխավոր խմբագիր, «Ազատություն» ռադիոկայանի աշխատակից, եղել է գրողների միության քարտուղար: 2003թ. նշանակվել է ՀՀ աշխատանքի եւ սոցիալական հարցերի նախարար: Պատգամավոր էր ընտրվել նաեւ 1999թ: Ամուսնացած է, ունի երկու երեխա

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե ՀովհաննիսյանիԼեւոն ՄարտիրոսյանիՆաիրա ԿարապետյանիՀայկ ԳրիգորյանիՄարգարիտ Եսայանի, ԲՀԿ խմբակցության պատգամավոր Տիգրան ՈւրիխանյանիԷլինար ՎարդանյանիՎահե Էնֆիաջյանի, ՀԱԿ-ից Լյուդմիլա Սարգսյանի,  Հրանտ Բագրատյանի, «Ժառանգությունից»` Ռուբեն ՀակոբյանիԽաչատուր Քոքոբելյանի, ՀՅԴ-ից` Արծվիկ Մինասյանի հետ:

Շարքը` Ինգա Մարտինյանի

Տպել
Ամենաշատ