ԵրեքշաբթիՀոկտեմբեր 21
  • USD 409.66
  • EUR 522.77
  • RUB 9.99

Ինչո՞ւ է ՊԵԿ-ը գաղտնի պահում մեքենաների մաքսային արժեքների գնացուցակը

00:21, 11.08.2012 Տարածաշրջան: Հայաստան Թեմա: Տնտեսություն, Վերլուծություն, Հասարակություն

Հայաստանի Հանրապետություն ներմուծվող ապրանքների ու տրանսպորտային միջոցների մաքսային արժեքի որոշման կարգը մինչ այսօր կարգավորված չէ: Գաղտնիք չէ, որ մաքսային մարմինները շարունակում են կողմնորոշիչ գներ կիրառել` հիմք չընդունելով արտասահմանում ձեռքբերված ապրանքների ինվոյսներում նշված արժեքները: Այս կարգից հատկապես տուժում են տրանսպորտային միջոցներ ներմուծողները: Մաքսային մարմինները անխտիր կիրառում են կողմնորոշիչ գին, ընդ որում` այդ գնի որոշման մեթոդը կամայական է: Մի քանի տարի առաջ ՊԵԿ-ը պաշտոնապես հրապարակեց կողմնորոշիչ գնացուցակ, սակայն այնուհետ այդ հրապարակումն անհայտացավ, իսկ կամայական գնահատականներն ակնհայտ կոռուպցիոն ռիսկեր են պարունակում: Ստորեւ ներկայացնում ենք NEWS.am-ի այս թեմայի շրջանակներում հարցադրումները ՊԵԿ-ին, պատասխանները եւ դրանց մեկնաբանությունը.

1. Հարց. Ինչպե՞ս, ի՞նչ չափանիշով է ՊԵԿ-ը որոշում ներմուծված ավտոմեքենաների մաքսային արժեքը:

Պատասխան. Մաքսային սահմանով տեղափոխվող ապրանքների մաքսային արժեքը որոշվում է ՀՀ մաքսային օրենսգրքով սահմանված կարգով (87-94 հոդվածներով):

Մեկնաբանություն. Մաքսային արժեքի որոշման հիմքը, այնուամենայնիվ, 82-րդ հոդվածն է, որտեղ հստակ նշված է` մաքսային արժեքը պետք է որոշվի հայտարարատուի կողմից, բացառությամբ այն դեպքերի, երբ դրա իրավունքը վերապահվում է մաքսային մարմիններին: Պատահական չէ, որ ՊԵԿ-ում այս հոդվածը չեն հիշում: Ինչ վերաբերում է 87-94 հոդվածներին` ապա դրանցում տրված են միայն մեթոդները` հիմնված 82 հոդվածի վրա:

2.Հարց. Ի՞նչ հաճախականությամբ է վերանայվում մաքսազերծման պայմանները (մաքսային արժեքի որոշման մեթոդները), ինչի՞ց ելնելով են դրանք փոփոխվում: Օրինակ` վերջին անգամ ե՞րբ են վերանայվել մաքսային արժեքի հաշվարկման մեթոդները: Վերանայման արդյունքում ավտոմեքենաների մաքսազերծման գումարները աճե՞լ են, թե՞ նվազել:

Պատասխան. Մաքսային արժեքի որոշման մեթոդների վերանայման որեւէ պարբերականություն նախատեսված չէ: Ինչպես արդեն նշեցինք` դրանք սահմանված են օրենքով, ինչը նշանակում է, որ նմանատիպ անհրաժեշտություն առաջանալու դեպքում, մաքսային արժեքի որոշման կարգում փոփոխությունները կարող են կատարվել ՀՀ Ազգային Ժողովի կողմից: Նշենք նաեւ, որ ՀՀ-ում կիրառվող մաքսային արժեքի որոշման կարգն ամբողջությամբ համապատասխանում է Առեւտրի Համաշխարհային Կազմակերպության երաշխավորություններին եւ սկզբունքային փոփոխությունների անհրաժեշտություն առայժմ չունի:

Մեկնաբանություն. Նորից անդրադառնանք 82-րդ հոդվածին: Օրենքում նշված է` մաքսային արժեքը որոշվում է Սակագների եւ Առեւտրի գլխավոր համաձայնագրին համապատասխան` կառավարության սահմանած կարգով: Այսինքն` կարգը սահմանվում է ոչ թե օրենքով, այլ կառավարության որոշմամբ: Սակայն, դատելով ՊԵԿ-ի պատասխանից, կառավարության կողմից հաստատված նման կարգ գոյություն չունի, հետեւաբար` անիմաստ է հղում անել միջազգային համաձայնագրին:

3. Հարց.  Խնդրում եմ տրամադրել Հայաստանի Հանրապետություն ներմուծվող ավտոմեքենաների մաքսային արժեքի որոշման ցանկը կամ կարգը (մեքենաների մաքսային արժեքների գնացուցակը): Ըստ ՊԵԿ-ի պաշտոնական կայքի տրամադրած տեղեկության` այդ ցանկը  հրապարակված է մաքսային համապատասխան կառույցում: Դրանից բացի, ըստ ՊԵԿ-ի կայքի, կա հատուկ հեռախոսահամար, որտեղից քաղաքացիները տեղեկանում են իրենց կողմից ներմուծվող ավտոմեքենայի մաքսային արժեքի մասին: Հետեւաբար, այդ տեղեկատվությունը ազատ է, սակայն քիչ հասանելի: Խնդրում ենք մեզ տրամաադրել մեքենաների մաքսային արժեքների գնացուցակը:

Պատասխան. Տեղեկացվում է նաեւ, որ մաքսային արժեքի որոշման գործընթացի թափանցիկությունն ապահովելու նպատակով մեր կողմից նախկինում մաքսային ծառայության ինտերնետային կայքէջում տեղադրվել էին տեղեկություններ ՀՀ մաքսային տարածք ներմուծվող որոշ ապրանքների մաքսային արժեքների վերաբերյալ: Սակայն այդ հարցի վերաբերյալ միջազգային փորձի  ուսումնասիրության արդյունքում պարզվեց, որ աշխարհի որեւէ պետություն մաքսային արժեքների կողմնորոշիչ չափանիշներ չի հրապարակում: Հաշվի առնելով նշված հանգամանքը, նպատակ ունենալով բացառել մաքսային արժեքների որոշման երկիմաստ մեկնաբանություններն, ինչպես նաեւ հիմք ընդունելով Համաշխարհային բանկի երաշխավորություններն ու մաքսային արժեքի որոշման «Սակագների եւ առեւտրի Գլխավոր Համաձայնագրի» 7-րդ գլխի բացատրական նշումները` այդ տեղեկությունները հանվել են կայքէջից:

Մեկնաբանություն. Այստեղ պետք է մի բան ավելացնել` աշխարհի որեւէ պետություն ոչ միայն կողմնորոշիչ գներ չի հրապարակում, այլեւ չի պարտադրում դրանք ներմուծողներին: Իսկ քանի որ մեր մաքսային մարմինները պարտադրում են` պետք է ուրեմն դրանք հրապարակեն, կամ գոնե իրենց որոշումները գրավոր հիմնավորեն: Որեւէ տնտեսվարող մինչ այսօր մաքսային աշխատողից գրավոր հիմնավորում չի ստացել, թե ինչ հիմքով է մերժվում գործարքի գնի մեթոդով մաքսային արժեքի որոշումը: Նշենք` մյուս բոլոր մեթոդները պետք է կիրառվեն միայն այն դեպքում, երբ այդ մեթոդը հնարավոր չէ կիրառել: Ինչ վերաբերում է «Սակագների եւ առեւտրի Գլխավոր Համաձայնագրի» կատարված հղմանը` ապա այդ համաձայնագրում հրապարակայնությունը սահմանափակող որեւէ դրույթ չկա: Եվս մեկ հանգամանք։ ՊԵԿ-ը իր պատճառաբանություններում Հայաստանի Հանրապետությունում գործող որեւէ օրենք, որով արգելվում է, կամ սահմանափակվում է հրապարակել ներմուծվող ավտոմեքենաների մաքսային արժեքի որոշման ցանկը, հակառակ դրա գործում է Տեղեկատվության ազատության մասին օրենքը,որը պարտավորեցնում է պետական մարմիններին տրամադրել լրատվամիջոցներին կամ քաղաքացիներին անհրաժեշտ տեղեկատվությունը, հետեւաբար NEWS.am-ը կրկին խնդրում է ՊԵԿ-ին տրամադրել ներմուծվող ավտոմեքենաների մաքսային արժեքի որոշման ցանկը, որով մեքենա ներմուծողները պարտավորված են մաքսազերծել մեքենաները, սակայն մինչեւ մեքենա ներկրելը քաղաքացիները հնարավորություն չունեն ծանոթանալու ցանկին։ 

Լուրեր Հայաստանից - NEWS.am

Այս թեմայով

Հայաստանում աղքատության «վերացումը». Համաշխարհային բանկի խորհուրդները

Համաշխարհային բանկի կարեւոր խնդիրներից է աշխարհում աղքատության հաղթահարումը…

Հերթական ռեկորդը Երեւանում. Մայիսին բնակարանների առքուվաճառքի գործարքների թիվն ա...

Այդ պայմաններում մարդիկ, ովքեր պետք է շտապ իրացնեն բնակարանը…

Երեւանի քաղաքապետարանը մսխում է հարկատուների փողերը (ֆոտո)

Միգուցե հին եզրաքարերը անցորդների համար մահացու վտա՞նգ էին ներկայացնում...

Ուկրաինական ճգնաժամը հարվածում է Ռուսաստանում աշխատող միգրանտներին

Ռուսաստանի ԿԲ-ի բազմամիլիարդանոց արժութային ինտերվենցիաները թույլ են տվել միայն ժամանակավորապես կանխել ռուբլու հետագա փլուզումը...

Բնապահպան. հայ օլիգարխները միջնադարյան պալատներ ու «չինական պարիսպներ» են կառուց...

Դա բիզնես է. քաղաքի ու բնակիչների շահերը հաշվի չեն առնվում…

Partner news