Հայաստանում գտնվող ադրբեջանցի գերի զինծառայող Ֆիրուզ Ֆարաջեւը առողջական որեւէ խնդիր չունի: Այս մասին NEWS.am-ին ասաց Գերիների, պատանդների եւ անհետ կորածների հարցերով հանձնաժողվին կից աշխատանքային խմբի ղեկավար Արմեն Կապրիելյանը:
«Ֆիրուզ Ֆարաջեւի առողջական վիճակը լավ է: Առողջության հետ կապված խնդիրներ չկան»,-ասաց աշխատանքային խմբի ղեկավարը:
Ինչպես տեղեկացվել էր ավելի վաղ, հուլիսի 26-ի գիշերվա ժամը 06:00-ի սահմաններում Հայաստանի ԶՈՒ շփման գծում ԱՀ զինծառայող, Ադրբեջանի քաղաքացի Ֆիրուզ Ֆարաջեւը հատել էր Հայաստանի պետական սահմանը եւ հանձնվել: Սահմանախախտը ձերբակալվել էր, կատարվում է քննություն: Ադրբեջանցի զինծառայողին գերեվարելու մասին անհապաղ տեղեկացվել էր Կարմիր խաչի միջազգային կոմիտեի երեւանյան պատվիրակությունը:
Ըստ ադրբեջանական լրատվամիջոցների` որոշ ժամանակ առաջ Ֆարաջեւը ճողվածքի հեռացման վիրահատության է ենթարկվել: Նույն լրատվամիջոցների հաղորդմամբ` զինծառայողների հարազատներին արդեն կանչել են ռազմական դատախազություն` տեղեկացնելու համար գերի հանձնվելու փաստով քրեական գործի հարուցման մասին:
Ֆարաջեւի` հայկական կողմ անցնելու պատճառների վարկածներից մեկը վերաբերում է համածառայակիցների կողմից նրա նկատմամբ ծեծին ու ճնշումներին:
