Նիդերլանդներում դեկտեմբերի 1-ին կայանալիք «Մանկական Եվրատեսիլ-2012»-ին մասնակցելու համար Հայաստանում հայտերի ընդունումը ավարտվել է օգոստոսի 20-ին եւ այժմ կատարվում է ամփոփում: Այս մասին NEWS.am-ի թղթակցի հետ զրույցում ասաց Եվրատեսիլի հայկական պատվիրակության ղեկավար Գոհար Գասպարյանը:
Նա տեղեկացրեց, որ հայտերը շատ-շատ են եղել, պարզապես դրանից կեսից շատը չի համապատասխանում չափանիշներին, օրինակ` մասնակցի տարիքը, երգերի գրագետ տեքստը, դրանց 25 տոկոսը օտար լեզվով լինելու հանգամանքը եւ այլն: Հայտեր եղել են Երեւանից, Արմավիրից, Գեղարքունիքից:
«Հայտերը շատ են, սակայն ներկայացված չափանիշներին համապատասխանում է մոտավորապես 20 երգ, որոնք հիմնական մրցակիցներ են լինելու»,- ասաց նա:
Այս 20 մասնակիցներից ժյուրին ընտրելու է լավագույններին` մոտավորապես 10 հոգի, եւ սեպտեմբերի կեսերին կայանալու է հայաստանյան նախընտրական հիմնական եզրափակիչ փուլը, որը կլինի շոու ծրագիր, ուղիղ եթերով կհեռարձակվի հեռուստատեսությամբ, ինչի արդյունքում 50/50 սկզբունքով` ժյուրին եւ հեռուստադիտողները` քվեարկությամբ, կընտրեն Հայաստանը «Մանկական Եվրատեսիլ-2012»-ում ներկայացնող մասնակցին: Հայաստանի մասնակցի անունը պետք է հայտնի լինի ամենաուշը մինչեւ հոկտեմբերի կեսը:
Ի դեպ, այս տարվա հայտատուների մեջ կան նաեւ հայտնի անունները, ինչպես օրինակ` ոստիկանապետ Վլադիմիր Գասպարյանի դուստր Անգելինա Գասպարյանը, նախորդ տարվա մասնակիցներից Վահագն Գրիգորյանը, Միլենա Միսկարյանը, «Սթար» խումբը: «Շատ դրական կարծիք եմ կազմել, բազմաթիվ լավ երգեր կան»,- ասաց Գոհար Գասպարյանը:
Ավելի վաղ NEWS.am-ը հայտնել էր, որ Հայաստանում մեկնարկել է «Մանկական Եվրատեսիլ-2012»-ին մասնակցելու համար հայտերի ընդունումը: Բոլոր ցանկացողները հայաստանյան նախընտրական փուլին մասնակցելու համար կարող են դիմել մինչեւ օգոստոսի 20-ն ընկած ժամանակահատվածում:
Նշենք, որ Հայաստանում կայացած «Մանկական Եվրատեսիլ-2011»-ի հաղթող էր ճանաչվել Վրաստանից Candy խումբը, որի երգչուհիներից մեկն էլ հայուհի է` Աննա Խանչալյան: Իսկ «Մանկական Եվրատեսիլ-2012»-ը կկայանա դեկտեմբերի 1-ին Նիդերլանդներում, քանի որ մրցույթն անցկացնելու հայտը շահել է այդ երկիրը: