Սիրիայի հայկական թաղամասերում որեւէ ավերածություն, խուճապային իրավիճակ չկա, ուղղակի մարդիկ խուսափում են փողոց դուրս գալուց, որովհետեւ եթե փողոցներում բախումներ կան. վտանգավոր է, ցանկացած անզգույշ շարժում կարող է վնաս պատճառել: Այս մասին օգոստոսի 21-ին ասաց Հայաստանի սփյուռքի նախարար Հրանուշ Հակոբյանը` օդանավակայանում ամառային հանգիստն Հայաստանում անցկացնելու նպատակով այստեղ ժամանած սիրիահայ երեխաների երրորդ խումբը դիմավորելու ժամանակ:
Նախարարի խոսքով` որեւէ մեկին պարտադրել իր տնից դուրս գալ եւ գալ, ոչ մեկ չի կարող, սակայն եթե նրանք` սիրիահայերը, ուզում են գալ, ապա դրա համար ավելացվել են թռիչքները: «Յուրաքանչյուր պահ թելադրում է նոր իրավիճակ, նորից եմ կրկնում` ինչքան վիճակը ծանր է, գալու ցանկություն ունեցողներ շատ կլինեն, ինչքան վիճակը կայուն է կամ գոնե տանելի է, այնքան մարդիկ գերադասում են մնալ իրենց տներում»,- ասաց նա` Սիրիայում ստեղծված իրավիճակը հայերի համար գնահատելով որպես տանելի, քանի որ չունեն այն խուճապը, որ «շտապ օդանավեր ուղարկեք, ցանկանում ենք դուրս գալ այստեղից»: Նա նաեւ նշեց, որ սիրիացիները չեն ցանկանում տեղափոխվել Լիբանան, «նման բան չկա, որոշ ընտանիքներ են միայն տեղափոխվել»:
Նախարարը տեղեկացրեց, որ Լիբանանի «Ազդակ» թերթի խմբագիր Շահան Քանդահարյանից Սփյուռքի նախարարությունը լուր է ստացել, որ օգոստոսի 21-ին Հալեպը կառավարական զորքերն են վերահսկում: «Փառք ու պատիվ մեր հայկական համայնքին, նրանք իրենց չեզոքությամբ կարողանում են պահպանել հանգստություն եւ կայունություն համայնքում, որպեսզի չանցնեն մեկի կամ մյուս կողմը եւ ավելորդ լարվածություն լինի»,- ասաց նախարարը:
Անդրադառնալով սիրիահայ երեխաների Հայաստանում սովորելու խնդիրներին` սփյուռքի նախարարը տեղեկացրեց, որ նախարարությունում ստեղծել են սփյուռքահայերից բաղկացած աշխատանքային խումբ եւ փորձում են հասկանալ, թե ինչպիսի դպրոցներում երեխաները պետք է սովորեն:
Կա երեք տարբերակ, առաջինը, որ երեխան սովորի մեր սովորական դպրոցում, այդ իսկ նպատակով Շահումյանի անվան դպրոցում բացվել է արեւելահայերի ուսուցման արագացված կուրսեր, որտեղ 50 երեխա այսօր սովորում է: Երկրորդ տարբերակն այն է, որ դպրոցներում որոշակի դասարաններում իրականացնեն արեւմտահայերի ուսուցում, ինչի համար կան Սիրիայից եկած ուսուցիչներ, որոնք կարող են ուսուցում տալ երեխաներին: Երրորդ տարբերակն էլ այն է, որ այստեղ սիրիական դասարաններ ստեղծվեն, երեխաները կրթությունը շարունակեն սիրիական ծրագրով, սիրիական ծրագիրը համադրվի հայկական ծրագրի հետ, այս ծրագրով պետք է սովորեն այն ընտանիքները, որոնք մտադիր են հետագայում վերադառնալ Սիրիա:, այս տարբերակը ԿԳՆ-ի հետ քննարկման փուլում է: Հրանուշ Հակոբյանը նշեց, որ ակնկալում են մինչեւ սեպտեմբերի 1-ին հստակություն մտցվի այս հարցում եւ կոնկրետ որոշում լինի` համապատասխան քայլեր ձեռնարկելու նապատակով: Սփյուռքի նախարարի խոսքով` քիչ չեն նաեւ այն երիտասարդները, ովքեր ցանկանում են այստեղի բուհերում սովորել: Այս առումով նրանք հարց են բարձրացրել, որ եթե երեխան նվազագույն գիտելիք ունի, սովորի առաջին կուրսում, ոչ թե նախապատրաստական, քննարկել են նաեւ, որպեսզի Սիրիայի երիտասարդների եւ Հայաստանի երիտասարդների ուսման վարձը նույնացվի:
Հրանուշ Հակոբյանի խոսքով` այսօր Հայաստանում մոտ 1500 սիրիահայ կա, այսինքն` մոտավորապես 250-300 երեխա կա, որոնց մասին պետք է մտածել: Նրանց մի մասը տեղավորված է Երեւանում, մի մասը` մարզերում: Նախարարի խոսքով` Հնչակյան կուսակցությունը պարտավորություն է վերցրել վճարել ուսուցիչների գումարը, ինչպես նաեւ երեխաների տրանսպորտային ծախսերը` դպրոց տեղափոխելու համար:
Հիշեցնենք, որ Հայաստանի կառավարությունը օգոստոսի 2-ի նիստի ժամանակ 9 միլիոն դրամ (մոտ 22 հազար դոլար) է հատկացրել Տարածքային կառավարման նախարարությանը` սիրիահայ երեխաների ամառային հանգիստը կազմակերպելու համար: Մինչ օգոստոիս 21-ը, Սիրիայից Հայաստան էր ժամանել երեխաների երկու խումբ: Առաջինը` Դամասկոսից Հայաստան էր ժամանել շուրջ 120 երեխա, երկրորդ խումբը` Հալեպից շուրջ 150 երեխա եւ երրորդ խումբը եւս Հալեպից` շուրջ 150 երեխա: Սիրիահայ երեխաները հանգստանում են Հանքավանի «Լուսաբաց» եւ «Հասմիկ» ճամբարներում: Դամասկոսից ժամանած երեխաների 14-օրյա հանգիստը ավարտվելու է օգոստոսի 23-ին, Հալեպից ժամանած առաջին խմբի երեխաներինը` օգոստոսի 28-ին, իսկ Հալեպից ժամանած երկրորդ խմբի երեխաների հանգիստը` սեպտեմբերի 4-ին: