Ռոք երաժիշտ Էրիկ Քլեփթոնի հավաքածուից գերմանացի նկարիչ Գերհարդ Ռիխտերի «Աբստրակտ գեղանկարչություն» կտավը վաճառվել է լոնդոնյան Sotheby`s աճուրդի ժամանակ`34,2 միլիոն դոլարով: Այսպիսով նկարը դարձել է հեղինակի կենդանության օրոք ամենաթանկ վաճառված աշխատանքը:
Ինչպես հաղորդում է AP-ն, 2001 թ-ին Քլեփթոնը այս նկարը, երկու այլ կտավների հետ միասին ձեռք է բերել 3,4 միլիոն դոլարով: Նոր գնորդի ինքնությունն անհայտ է:
Ինչպես գրում է «Լենտա.ru»-ն, 80-ամյա Ռիխտերը հանդիսանում է կենդանի նկարիչների մեջ ամենաթանկը, թեեւ ինքը նկարչության մեջ արժեքը աբսուրդային է համարում: Վերջին 5 տարիների ընթացքում նրա մի քանի աշխատանքներ վաճառվել են 10 միլիոն դոլարից ավելի արժեքով:
67-ամյա Էրիկ Քլեփթոնը ունի արվեստի հսկայական հավաքածու: 2011 թ-ին նա վաճառել է կիթառների մեծ հավաքածուն, որից ստացված գումարը փոխանցել է թմրամոլների ու հարբեցողների վերականգնողական կենտրոնին: Թե ինչ նպատակներով կծախսվեն Ռիխտերի նկարից ստացված գումարը, դեռեւս հայտնի չէ: