Արժույթի միջազգային հիմնադրամի նախկին ղեկավար Դոմինիկ Ստրոս Կանը եւ նրա ենթադրաբար նոր ընկերուհին 330 հազար եվրո են պահանջում VSD եւ Closer ամսագրերից, որոնք սեպտեմբերի սկզբին հրապարակել են իրենց համատեղ լուսանկարները:
Հունիսին ֆրանսիական լրատվամիջոցները հայտնել են, որ սեքսուալ սկանդալներով հայտնի Ստրոս Կանը բաժանվել է կնոջից՝ լրագրողուհի Անն Սինքլերից: Որոշ ժամանակ անց լրատվամիջոցները հրապարակել են ԱՄՀ-ի նախկին ղեկավարի լուսանկարները, որտեղ նա գրկել է ծագումով մարոկկացի ֆրասուհի Մարիամ Լաուֆիրին, ում լրագրողներն անվանել են Ստրոս Կանի նոր ընտրյալ: Ի պատասխան, Ստրոս Կանը եւ Լաուֆերը դիմել են դատարան, հաղորդում է «Գոլոս Ռոսիին»:
Այսօր՝ հոկտեմբերի 16-ին, Փարիզում տեղի են ունեցել այդ գործող լսումները, իսկ դատավճիռը ակնկալվում է հոկտեմբերի 30-ին: ԱՄՀ նախկին ղեկավարը պահանջում է 80 հազար եվրո գանձել VSD ամսագրից, եւ 50 հազար եվրո՝ Closer ամսագրից՝ անձնական կյանք ներխուժելու եւ իր նկարն օգտագործելու իրավունքը խախտելու համար:
Լաուֆիրն, իր հերթին, պահանջում է տուգանել երկու ամսագրերին 100 հազարական եվրոյով: Նրա փաստաբան Լորան Ժուրդանը լսումների ժամանակ նշել է, որ նախկինում հասարակությունը չէր ճանաչում իր պաշտպանյալին եւ չէր հետաքրքրվում նրա կյանքով, իսկ հիմա նրա հետեւից իսկական հետապնդում է սկսվել:
VSD պարբերականի դատապաշտպանը հայտարարել է, որ թերթը պարտավոր էր ցույց տալ Ստրոս Կանի հայտարարությունների ու գործողությունների միջեւ առկա հակասությունները, ով մեկ տարի առաջ հեռուստահարցազրույցում հայտարարել էր, որ հրաժարվում է կանանց հանդեպ իր «թեթեւ վարքից»:
Նշենք, որ Մարիամ Լաուֆերը գլխավորում է սոցիալական ցանցերում France Televisions հեռուստաալիքների խմբի մարքեթինգի բաժինը:
Հիշեցնենք, որ վերջերս իր հարցազրույցներից մեկում Ստրոս Կանը խոստովանել էր, որ չէր սպասում նման քաղաքական հետեւանքներ իր արտամուսնական կապերի պատճառով: