Խոսե Անդրե Մոնտանո Բայնան ընդամենը 7 տարեկան է, սակայն երաժշտական անհավատալի տաղանդ ունի, որը նրան հնարավորություն է ընձեռել նվագելու Բոլիվիայի լավագույն բեմերում:
Ինչպես հայտնում է բրիտանական «The Daily Telegraph»-ը, Խոսե Բայնան Բոլիվիայում ծագող աստղ է: Ջազի հեռանկարային երաժիշտը, սակայն, կույր է:
4 տարեկանից սկսել է հարվածային գործիքներ նվագել եւ շուտով անցել դաշնամուրի: 5 տարեկանում տղան արդեն ձեւավորել էր ջազային եռյակը:
Բացի նրանից, որ տղան վախեցնող դյուրությամբ կարողանում է նվագել ջազային ցանկացած երաժշտություն, նա նաեւ երաժշտական լավ ճաշակ ունի եւ միայն ջազով չի սահմանափակվում: «Բլյուզ, տանգո, բոլերո, ամեն ինչ սիրում եմ», - ասել է Մոնտանո Բայնան
Նա արդեն ելույթ է ունեցել Բոլիվիայի լավագույն բեմերից մի քանիսում: Հանդես է եկել նաեւ այնպիսի հայտնի երաժիշտների հետ, ինչպես օրինակ բոլիվիացի ռոքեր Գլեն Վարգասն է: Մոնտանո Բայնան մնացած բոլոր հարցերում յոթնամյա մյուս երեխաների նման է:
