Պետբյուջեի ծախսային մասի շուրջ իսկական մարտեր են մղվում քաղաքական ուժերի կողմից: Եկամտային մասը, բացի արտաքին վարկերից, գրեթե դուրս է մնում հանրության տեսադաշտից: Սակայն հենց դրանից են կախված վերոնշյալ ծախսերը:
Ընթացիկ տարվա հունվար-սեպտեմբերին Հայաստանի 1000 ամենախոշոր հարկատուները պետբյուջե էին վճարել 394,9 մլրդ դրամ, ինչը 42,1 մլրդ դրամով (կամ 11,9%-ով) ավելի է նախորդ տրավա նույն ժամանակահատվածի ցուցանիշից: Այս համապատկերում մնացած հարկ վճարողների ցուցանիշները շատ համեստ են թվում:
Այդ «մնացածները», ըստ էության, փոքր եւ միջին բիզնեսի ներկայացուցիչներն են, որոնք պետբյուջե են վճարել մոտ 122,1 մլրդ դրամ, ինչը զիջում է «խոշորների» ցուցանիշը 3,2 անգամ: Արդյունքում «խոշորների» մասը ընդհանուր հարկային եկամուտների մեջ աճել է1,1 տոկոսային կետով` դիտարկվող շրաջանում հասնելով 76,4%-ի:
Դա կոնյունկտուրային փոփոխություն չէ. եթե դիտարկենք երկարաժամկետ հեռանկարում հարկերի կառուցվածքում տեղաշարժերը, ապա կնկատվի «մնացած» հարկատուների մասի նվազման միտում:
Ինն ամսվա կտրվածքով ընդհանուր հարկային եկամուտներում «մնացածների» տեսակարար կշիռը 2010թ. հասել է մինչեւ 25,3% նիշի, հետո սկսել է հետեւողական կերպով նվազել` հաշվետու շրջանում կազմելով արդեն 23,6%: Պետք չէ այդ փաստն ընդունել որպես «մնացածի» կողմից վճարված գումարի կրճատում: Ընդհակառակը, 2009-2012թթ. համար նրանց կողմից վճարված հարկերի բացարձակ աճը կազմել է մոտ 35,2 մլրդ դրամ:
Սակայն «խոշորների» դեպքում այդ ցուցանիշն անհամեմատ բարձր է` մոտ 124,4 մլրդ դրամ: Այդ նույն տարիներին նրանց կողմից պետբյուջե վճարվող հարկերի վճարման տեմպն աճել է 46,0%-ով, ինչը 5,5 տոկոսային կետով բարձր է «մնացածների» ցուցանիշից:
Գծապատկերից ակնհայտ է հարկերի գումարում հարկատուների երկու խմբի` «խոշորների» եւ «մնացածների» անհամամասնությունը: Սակայն պետք չէ համարել, որ այդ բոլոր 1000 «խոշորներն» իրականում խոշոր ընկերություններ են, իսկ ՓՄՁ-ներն ամբողջությամբ «մնացածների» մեջ են մտնում:
Այդ 1000 «խոշոր հարկատուների» միջեւ եւս հսկակական անհամամասնություններ կան: Այսպես, առաջին 500 առեւտրային ընկերությունները հունվար-սեպտեմբերին ապահովել են բոլոր հազարի կողմից վճարված գումարի 89,6%-ը:
Եթե վերցնենք 1 մլրդ դրամի հարկային շեմը, ապա 67-րդ հորիզոնկանից «միլարդատերները» տեղը զիջում են ավելի փոքր ընկերությունների: Սակայն ցուցակով հաջորդը համարվող ընկերության կողմից վճարված հարկի տարբերությունը չնչին է` ընդամենը 68 հազ. դրամ:
Այդ հազար «խոշորների» առաջին տասնյակը հունվար-փետրվարին վճարել է 107,8 մլրդ դրամ (կամ արդյունքի 27,3%-ը), իսկ ցուցակի վերջին տասնյակը` ընդամենը 0,5 մլրդ դրամ (0,1%):
Ինչպես վերեւում նշվեց, այս տարվա հունվար-սեպտեմբերին, նախորդ տարվա նույն ժամանակահատվածի համեմատ, պետբյուջե վճարված հարկերի բացարձակ աճը կազմել է 42,1 մլրդ դրամ: Այդ աճի կեսն ապահովել են թվով 42 ընկերություններ: Միաժամանակ, անցած տարվա հունվար-փետրվարին աճի կեսը բաժին էր ընկնում 47 ընկերության: Այսինքն, տարվա ընթացքում նրանց թիվը նվազել է:
Կյանքը ցույց է տալիս, որ խոշոր ընկերությունների վրա խաղադրույքը կարող է ծանր հետեւանքներ ունենալ ինչպես պետբյուջեի, այնպես էլ ընդհանուր առմամբ տնտեսության վրա: Հիշենք, թե ինչպես միջազգային շուկայում իրավիճակը հանգեցրեց Զանգեզուրի պղնձամոլիբդենային կոմբինատի կողմից հարկերի նվազմանը, որը մինչ այդ «խոշորների» անվիճելի առաջատարն էր:
Ալբերտ Խաչատրյան