Հայաստանի գյուղատնտեսության ոլորտում դրական տեղաշարժերը` արտադրության ծավալների ավելացումը, դրականորեն են անդրադարձել հանրապետության արտաքին ապրանքաշրջանառության ծավալների վրա: Այդ մասին այսօր` դեկտեմբերի 26-ին լրագրողների հետ հանդիպմանը հայտնել է Հայաստանի գյուղատնտեսության նախարար Սերգո Կարապետյանը:
«2012 թվականի դեկտեմբերի 25-ի դրությամբ հանրապետությունից արտահանվել է, ընդհանուր վերցրած, 31.0 հազ. տոննա պտուղ, խաղող, բանջարբոստանային մշակաբույսեր և կարտոֆիլ, որը գերազանցում է 2011 թվականի մակարդակը 87.0 %-ով:
Գյուղատնտեսության ոլորտում 2012 թվականին ստեղծված իրավիճակն արդյունք է ինչպես գյուղատնտեսության ոլորտում տնտեսավարողների քրտնաջան աշխատանքի, այնպես էլ ոլորտում իրականացված մի շարք առաջնահերթ ծրագրերի, այդ ծրագրերից կարելի է առանձնացնել հետևյալները»,- նշել է նախարարը:
«Պետական աջակցություն գյուղատնտեսական հողօգտագործողներին ծրագիրը»: Վերջինս իրականացվել է «Հայաստանի Հանրապետության 2010-2014թթ. ցորենի սերմնաբուծության և սերմարտադրության զարգացման ծրագրի» շրջանակներում:
Ծրագրերի իրականացումը հնարավորություն ստեղծեց աշնանացանի տարածքները հանրապետությունում 2012 թվականին հասցնել ավելի քան 100.0 հազ. հա-ի, նախորդ տարվա 95.9 հազ. հա-ի դիմաց:
«Անասնապահության զարգացման համար կարևոր է համարվում արտերկրից տոհմային բարձր և մթերատու հատկանիշներ ունեցող երինջների ներկրման և վերարտադրության ապահովման միջոցով գյուղատնտեսական կենդանիների հոտի կառուցվածքի բարելավման ծրագիրը: 2012 թվականին եվրոպական երկրներից ներկրվել է 210 գլուխ տոհմային երինջ: Գլխաքանակը, տարաժամկետ վճարման պայմանով, 4 տարի մարման ժամկետով, հատկացվել է գյուղացիական տնտեսություններին: Եկող տարվա առաջին եռամսյակում կներկրվի ևս 475 գլուխ: Ներկրված կենդանիների կաթնատվությունը 2-3 անգամ գերազանցում է հանրապետության կովերի միջին կաթնատվությանը»,- արձանագրել է նախարարը:
Նրա խոսքով, ընթացիկ տարում վերամշակող ընկերությունների կողմից մթերվել է 59.2 հազ. տոննա պտուղ-բանջարեղեն: Միայն պտղի մթերման ծավալները կազմել է 25.5 հազ. տոննա, որը գերազանցում է նախորդ տարվա մակարդակը 1.8 անգամ:
Ավելի քան 40 ընկերություններ իրականացրել են խաղողի մթերում: Ընդհանուր առմամբ մթերվել է 156.6 հազ. տոննա խաղող, որը գերազանցում է նախորդ տարվա նույն ժամանակահատվածի ծավալը 21.5 տոկոսով: Խաղողի մթերումների միջին գինը 1 կգ-ի համար կազմել 142.1 դրամ, նախորդ տարվա 131.9 դրամի դիմաց:
Գրանցվել է մթերումների դիմաց կատարվող վճարումների բարձր մակարդակ: Մթերված գյուղատնտեսական մթերքների արժեքը կազմում է 26.8 մլրդ դրամ, որի դիմաց ս.թ. դեկտեմբերի 25-ի դրությամբ վճարվել է 26.56 մլրդ դրամ, այսինքն վճարումների մակարդակը կազմել է 99.1 %: Մնացած գումարը` 0.9 % կվճարվի մինչև դեկտեմբերի վերջը»,- ասել է Կարապետյանը` որպես ձեռքբերում նշելով նաեւ մայրաքաղաքի երկու վարչական շրջանում գյուղատնտեսության նախարարության և Երևանի քաղաքապետարանի նախաձեռնությամբ կազմակերպված գյուղատնտեսական մթերքների երեք տոնավաճառները:
