2011թ. դեկտեմբերին Հայաստանից Ռուսաստան խաղող արտահանող 15 ավտոմեքենա, ունենալով բոլոր անհրաժեշտ ուղեկցող փաստաթղթերը, հատել են Վերին Լարսի սահմանային անցակետը, որոնցից 8-ը ուղեւորվել է Մոսկվա, իսկ 7-ը` Ռյազան: Այս մասին նշված է ՀՀ Վերահսկիչ պալատի եւ ՌԴ Հաշվիչ պալատի համատեղ հաշվետվության մեջ:
Սակայն Ռյազան տեղափոխված բեռը ամբողջությամբ վերադարձվել է, քանի որ «Ռոսսելխոզնադզորը» ապրանքի մեջ բացահայտել է վնասակար հարուցիչ (պավելիկա) եւ տրվել է համապատասխան եզրակացություն: Սակայն Մոսկվա ուղարկված նույն խաղողը ստուգումն անցել է առանց վերապահումների:
Նշվել է, որ ՌԴ օրենսդրության մեջ կան հակասություններ, որը պայմաններ է ստեղծում «Ռոսսելխոզնադզորի» պաշտոնատար անձանց կողմից ՌԴ մաքսային սահմանով ներմուծվող կամ արտահանվող արտադրանքի սահմանափակման կամ թույլտվության վերաբերյալ ոչ միանշանակ որոշումներ ընդունելու համար:
