Չեմ բացառում, որ այս տարի ԱՄՆ նախագահ Բարաք Օբաման ճանաչի Հայոց Ցեղասպանությունը։ Այս մասին փետրվարի 10-ին լրագրողների հետ հանդիպմանը հայտարարեց ՀՅԴ Բյուրոյի անդամ, ԱԺ ՀՅԴ խմբակցության ղեկավար Վահան Հովհաննիսյանը՝ հավելելով, որ ԱՄՆ նախագահի կողմից Ցեղասպանության ճանաչումն էականորեն կախված է լինելու նրանից, թե Կոնգրեսի արտաքին հարաբերությունների հանձնաժողովը ինչ բանաձեւով հարցը կփոխանցի Կոնգրեսին։
Անդրադառնալով ԱՄՆ Կոնգրեսում Հայոց Ցեղասպանության հարցի քննարկմանը, Վահան Հովհաննիսյանն ասաց, որ քննարկումը հայկական լոբբիստական կազմակերպությունների ջանքերի արդյունք է, եւ ԱՄՆ-ը դրանով ամենեւին էլ չի փորձում ճնշել Թուրքիային։
Հիշեցնենք, որ Միացյալ Նահանգների Կոնգրեսի Ներկայացուցիչների պալատի արտաքին հարաբերությունների հանձնաժողովում մարտի 4-ին քվեարկության է դրվելու Հայոց ցեղասպանության ճանաչման 252 բանաձեւը։