Ակնհայտ է, որ Հայաստանում ընտրական համակարգը դադարել է իշխանության ձեւավորման կամ իշխանափոխության միջոց լինել: Այս մասին, այսօր՝ ապրիլի 22-ին, մամուլի ասուլիսում հայտարարել է ՀՅԴ գերագույն մարմնի փոխներկայացուցիչ Աղվան Վարդանյանը: Նրա խոսքով՝ Հայաստռանի ողջ պետական համակարգը վերածվել է ընտրական համակարգի:
«Նախագահական ընտրություններից առաջ մենք արեցինք ամեն հնարավորը, որպեսզի ընդդիմության համար միասնական քաղաքական օրակարգ ձեւավորենք, ցավոք չստացվեց: Եվ ՀՅԴ-ն չմասնակցեց նախագահական ընտրություններին, քանի որ դրանց արդյունքները կանխորոշված էին»,-ընդգծել է Վարդանյանը:
Սակայն, ներկայումս, նրա կարծիքով, եկել է պահը, երբ ժողովուրդը գիտակցում է, որ իշխանության միակուսակցական համակարգը չպետք է լինի: «Այդ դժգոհությունն արտահայտվեց նախագահական ընտրությունների ժամանակ: Երեւանի ընտրություններում մենք նորից, առանց որեւէ հավակնության, ընդդիմությանմիավորման փորձ նախաձեռնեցինք եւ նորից չստացվեց»,-ասել է նա:
Այդուհանդերձ, դաշնակացական գործիչը համարում է, որ Երեւանի ավագանու ընտրություններում կան բոլոր շանսերը ընդդիմադիր ուժերի միավորման համար:
«Չորս ընդդիմադիր ուժեր ինքնուրույն գնում են ընտրությունների ու թեեւ իշխանությունը փորձում է լարվածություն ստեղծել նրանց միջեւ, նրանք ավելի շատ ձայն կհավաքեն եւ կփոխեն իշխանությունը Երեւանում»,-ասել է Աղվան Վարդանյանը՝ հավելելով, որ ընդդիմությանը միավորող ուժ կարող է լինել միայն ՀՅԴ-ն:
Նշենք, որ Երեւանի ավագանու ընտրությունները տեղի են ունենալու մայիսի 5-ին:
