Փարիզում գործող «Հայկական վերածնունդ շարժում» կազմակերպությունը հանդես է եկել հայտարարությամբ, որտեղ նշում է, որ աջակցում է Հայաստանում գործող քաղաքացիական շարժումներին:
Հայտարարությունում, մասնավրապես, ասվում է.
«Վերջերս հիմնված «Հայկական վերածնունդ շարժումը», ներշնչված Հայաստանի քաղաքացիական շարժումներից, ընդլայնում է իր համահայկական բնույթը, աշխուժորեն գործելով Ֆրանսիայի, ինչպես նաեւ Լիբանանից, Հյուսիսային Ամերիկայից եւ Եվրոպայից Ռուսաստան տարածված իր մասնաճյուղերով, նեցուկ կանգնելով հայկական այս զարթոնքին:
Ապրիլ 24-ին էլ «Հայկական վերածնունդը» կմասնակցի հայ ժողովուրդի պայքարին ի խնդիր Հայոց ցեղասպանության միջազգային դատապարտման եւ թուրք պետության կողմից մեր ժողովրդին վնասի հատուցման ի նպաստ մղվող պայքարին: Միաժամանակ այն չի անտեսում սփյուռքին հուզող հրատապ այլ հարցերը, ինչպես Սիրիայի հայության դաժան կացությունը:
Հայաստանի ներսում «Հայկական վերածնունդ շարժումն» աջակցում է քաղաքացիական շարժումներին ու մերժում կեղծված ընտրությունների միջոցով իրեն վերարտադրող օլիգարխիկ նեխած համակարգը, որը չի վարանում անարդար, ապօրինի ու բիրտ միջոցներով խեղդել եւ հուսալքել մեր ժողովուրդը:
1915-ին Թուրքիայի կողմից 1.5 միլիոն հայերի ջարդերից հետո անընդունելի է, որ մեր ժողովուրդը ենթարկվի իր իսկ իշխանությունների կողմից ճնշումների, անարդարությունների, աղքատացման եւ հուսալքման, որի արդյունքում տեղի է ունենում զանգվածային եւ աննախընթաց արտագաղթը, որն սպառնում է հայ ժողովրդի գոյատեւմանը:
Սակայն մենք պատճառ ունենք հպարտանալու, որ հակառակ օլիգարխա-մաֆիական իշխանությունների բռնություններին, մեր ժողովուրդը համարձակվում է ոտքի կանգնել եւ օրենքի ու սահմանադրության ծիրում խաղաղորեն ու քաջաբար պայքարել հանուն արդար, ծաղկուն, մարդու իրավունքներն ու արժանապատվությունն ապահովող պէտության կերտման:
«Հայկական վերածնունդ շարժումը» խստորեն դատապարտում է նեխած իշխանությունների կողմից մեր ժողովրդի ազնիվ զավակների դեմ գործադրված հալածանքներն ու ծեծերը եւ զգուշացնում նրանց հեղինակները նոր գրգռությունների դէմ:
Կեցցե հայ ժողովրդի արդար պայքարը
Կեցցե հայ ժողովրդի դիմադրականությունը եւ իր Վերածնունդը
Փարիզ 22 ապրիլ 2013»:
