Թուրքիան տարածաշրջանում կայունություն է ցանկանում եւ Հայաստանի հետ հարաբերությունների կարգավորում, ինչպես նաեւ՝ Հայաստանի եւ Ադրբեջանի հարաբերությունների: Այս մասին այսօր՝ մայիսի 31-ին, հայտնել է ԵԽԽՎ-ի Թուրքիայի պատվիրակ Նուրսունա Մեմեկանը, որը մասնակցում է Երեւանում ընթացող ԵԽԽՎ-ի Մշտական հանձնաժողովի նիստին:
«Մենք ուժերի ներածին չափով կնպաստենք հարաբերությունների կարգավորմանը եւ հուսով ենք, որ դուք էլ նույնը կանեք: Հայաստանը եւ Ադրբեջանն էլ է պետք է նման կերպով մոտենան հարցին», - ասել է նա:
Ինչ վերաբերում է հայ-թուրքական արձանագրություններին, ԵԽԽՎ-ի պատվիրակը հույս է հայտնել, որ փաստաթղթերը «կվերադարձվեն»: «Ես հույս ունեի, որ հարաբերությունները կկարգավորվեն, սակայն դա տեղի չունեցավ», - նշել է Մեմեկանը:
Լրագրողների այն հարցին, թե ցանկանում է արդյոք Անկարան վավերացնել նշված փաստաթղթերը, խորհրդարանականը պատասխանել է. «Այո, ցանկանում է», սակայն հրաժարվել է նշել մինչ օրս դա չանելու պատճառները:
Մուրսունա Մեմեկանն ընդգծել է, որ սա իր երկրորդ այցն է Երեւան եւ նշել, որ ուրախ է տեսնել Հայաստանի մայրաքաղաքի զարգացումը:
