Հայ-թուրքական արձանագրությունների գոյությունն արդեն հայկական դիվանագիտության ձախողումն է: Այս մասին NEWS.am-ի թղթակցի հետ զրույցում հայտնել է ՀԱԿ խորհրդարանական խմբակցության ղեկավար Լեւոն Զուրաբյանը:
Ըստ նրա` հայ-թուրքական արձանագրություններն ապահովել են այն, ինչ անհրաժեշտ է Թուրքիային. այսինքն` համաձայնելով պատմությունն ուսումնասիրելու հանձնաժողով ստեղծել, հայկական կողմը, ըստ էության, կասկածի տակ է դրել Ցեղասպանության փաստը: «Դա հենց այն էր, ինչ պետք էր Թուրքիային, որը կարողացել է դանդաղեցնել Հայոց ցեղասպանության միջազգային ճանաչման գործընթացը»:
Ըստ ընդդիմադրի` ինչ-որ չափով «շախմատային դիվանագիտության» հետեւանքով շահել է նաեւ ԱՄՆ-ն` լուծելով տարածքային խնդիրը. Կոնգրեսում եւ Սպիտակ տանը գրեթե վերացնել հայկական լոբբին: «Կողմերից միակը, ով ոչինչ չի շահել, Հայաստանն է: Չնայած մեր երկրում մեկ մարդ, այնուամենայնիվ, օգուտ ստացավ` Սերժ Սարգսյանը, որը օգտագործելով այդ նախաձեռնությունը, ստացավ միջազգային հանրության աջակցությունը իր պաշտոնավարումը երկարացնելու համար», - եզրակացրել է Լեւոն Զուրաբյանը:
