Հայաստանում Ֆրանսիայի դեսպան Անրի Ռենոն Ամանորը նշում է ընտանիքի հետ: Այս մասին նա նշել է NEWS.am-ի թղթակցի հետ զրույցում:
«Ըստ ավանդույթի, Ծննդյան տոները կնշեմ ընտանիքիս հետ: Ինչպես ամեն տարի, տոնական երեկոն կսկսվի խոհական մթնոլորտում նվերների փոխանակումով եւ ճրագալույցով, որի ընթացքում մատուցվում է այդ օրվա պարտադիր ավանդական հրուշակեղենը, հետո արդեն կհնչեն դաշնամուրի նվագակցությամբ կատարվող Ծննդյան տոնին նվիրված երգերը»,-նշել է նա:
Ֆրանսիայի դեսպանը Ամանորի նախաշեմին երեք մաղթանք է հղել հայ ժողովրդին:
«Նախ, Հայաստանին մաղթում եմ զարգացման մեծամեծ հաջողություններ: Եվրոպան նրա կողքին կլինի եւ Հայաստանը կարող է ապավինել Ֆրանսիային:
Հայ ժողովրդին ցանկանում եմ գործադրած ջանքերի արժանի հատուցում եւ որ գալիք տարին ավելի լավը լինի նախորդից:
Վերջում, ի նպաստ Ֆրանսիայի Հանրապետության նախագահի՝ Հայաստան կատարելիք պետական այցի, թո՛ղ, որ 2014-ին ամրապնդվի մեր երկրների բարեկամությունը եւ խորանա համագործակցությունը բոլոր ոլորտներում»: