Գերմանական BMW-ն եւ ճապոնական Toyota-ն մարզական նոր ավտոմեքենաների համատեղ արտադրության համաձայնագիր են ստորագրել:
Նախագծի ուղղությամբ աշխատանքը կտեւի 2-3 տարի, հայտնում է «Վեդոմոստին»՝ վկայակոչելով Financial Times-ը:
Ենթադրվում է, որ մարզական նոր ավտոմեքենաները կունենան հիբրիդային ուժային ագրեգատ՝ Toyota Prius-ի նմանությամբ:
Գործընկերության արդյունքում պետք է երկու տարբեր մեքենաներ ստեղծվեն՝ յուրաքանչյուր ապրանքանիշի համար առանձին, բայց ընդհանուր պլատֆորմով:
Նշվում է, որ ընկերություններն արդեն համագործակցում են վառելիքային տարրերի մշակման գործում: Բացի այդ, Ճապոնական ընկերությունը գերմանացի գործընկերոջ դիզելային շարժիչներն օգտագործելու իրավունք ունի:
Հիշեցնենք, BMW-ի մրցակից Mercedes-Benz-ն իր հերթին խորացնում է Renault-Nissan-ի հետ համագործակցությունը՝ կոմպակտ ավտոմեքենաներ եւ պրեմիում դասի սեդաններ արտադրելիս: