Հայաստանյան շուկան բաց է ցանկացած երկրի նավթամթերքի առաջ: Այդ մասին NEWS.am-ի թղթակցին հայտնել է Հայաստանի էներգետիկայի նախարար Արմեն Մովսիսյանը: Նրա խոսքով՝ Ռուսաստանի հետ համաձայնությունը առանց մաքսերի ՌԴ-ից նավթամթերքի ներկրման վերաբերյալ չի նշանակում, որ Հայաստանում մյուս երկրները չեն կարող նավթամթերք ներկրել:
Բուլղարիայից եւ Ռումինիայից ներկրման աղբյուրների վերաբերյալ հարցին Մովսիսյանը նշել է. «Եթե նրանց բենզինն էժան ու շահավետ լինի, նրանք կարող են մնալ մեր շուկայում: Պարզապես համաձայնությունը պայմաններ է ստեղծել ռուսական արտադրանքի ընդլայնման համար»: Դրա հետ մեկտեղ նախարարը հավելել է, որ որեւէ այլ երկրից ներկրման նկատմամբ խտրականություն չի լինելու:
Նախարարը հայտարարել է, որ Հայաստանը Ռուսաստանից առանց մաքսերի ներկրման քվոտա է խնդրել անցյալ տարվա նավթամթերքների ծախսի ծավալից մի փոքր ավել՝ պահանջարկի աճի դեպքում: Ավելի վաղ հաղորդում էին, որ ծավալը կարող է կազմել 300 հազար տոննա:
Նշենք, որ առայժմ Ռուսաստանից հայկական շուկա նավթամթերքի բաժինը կազմում է 30 տոկոս (2013թ.-ի հունվար-սեպտեմբեր): Ռուսական բենզինը Հայաստան չի ներկրվում:
