ԼՂՀ կառավարությունն այսօր՝ փետրվարի 11-ին կայացած նիստի ժամանակ որոշել է սուբսիդավորի բնակչության կողմից սպառվող էլեկտրաէներգիայի ծախսերի մի մասը:
ԼՂՀ կառավարության տեղեկատվության եւ հասարակայնության կապերի բաժնից հայտնում են. «Էլեկտրական էներգիայի նախկին եւ գործող սակագների տարբերության փոխհատուցումից ելնելով` այսօր ընդունած որոշմամբ, պետությունը կսուբսիդավորի բնակչության կողմից սպառվող էլեկտրաէներգիայի ծախսերի մի մասը (ցերեկային սակագնի համար 13, իսկ գիշերայինի համար` 8 դրամ/կՎտժ` ներառյալ ավելացված արժեքի հարկը)»:
Բացի դրանից՝ մոտ 3 մլրդ դրամ է հատկացվելու 12 գյուղատնտեսական կարեւոր նշանակության ծրագրերի իրագործման համար: Մասնավորապես, կիրականացվեն բույսերի պաշտպանության, անասնաբուժական եւ սանիտարական սպասարկման միջոցառումներ: