Ուկրաինական բուժծառայության բժիշկները փորձել են վերակենդանացնել Սերգեյ Նիգոյանին, ով Եվրամայդանում վիրավորվելուց հետո հայտնվել էր հիվանդանոցում, նրան ադրենալին են ներարկել, բայց դա չի օգնել: Հունվարի 22-ի գիշերը հերթապահած բժիշկ Ուլյանա Բելոուսի խոսքով, այդ օրն առավոտյան ամեն 10-15 րոպեն մեկ բուժկետ ծանր վիրավորների են բերել, ավելի հաճախ դրանք եղել են գլխի, պարանոցի կամ կրծքավանդակի վնասվածքներով անձինք:
Ուլյանան պատմել է, որ հարեւան վիրահատական սեղանին ծնար վիրավորի են պառկեցրել, սկսել են վերակենդանացնել, սակայն բոլոր ջանքերն ապարդյուն են եղել, երիտասարդը մահացել է: Ուլյանա Բելոուսը պատմել է, որ նախկինում ճանաչել է Նիգոյանին, երբ աշխատել է մոբիլ բրիգադների հետ: «Նա օգնության էր դիմել, երբ կտրել էր մատը: Շատ ուրախ մարդ էր երեւում»,- ասել է նա:
Մահից հետո հոգեւորական է եկել։ Երբ ավարտել է աղոթքը, լացել է: Պարզվել է, որ մի քանի տարի առաջ մահացել է հոգեւորականի նույն տարիքի որդին:
Հիշեցնենք, որ Սերգեյ Նիգոյանը մահացել էր հունվարի 22-ին, Գրուշեւսկի փողոցում ոստիկանների եւ ցուցարարների միջեւ բախման ընթացքում ստացած հրազենային վնասվածքի հետեւանքով: