ՀՊՃՀ ռեկտոր Արա Ավետիսյանի փորձերը՝ տապալել փետրվարի 20-ին համալսարանի տարածքում «ԴԵՄ ԵՄ» թիմի կազմակերպած պարտադիր կուտակային կենսաթոշակների դեմ իրազեկման ակցիան, ձախողվեցին, եւ ակցիան կայացավ (ֆոտոռեպորտաժ)։

Նախօրեին համալսարանի Ռեկտորատի, Արհմիութենական կազմակերպության կոմիտեի եւ Ուսանողական խորհրդի անունից տարածվել էր համատեղ հայտարարություն, որով «Դ!ԵՄ ԵՄ» քաղաքացիական նախաձեռնությանը կոչ էին անում ձեռնպահ մնալ ՀՊՃՀ տարածքում նմանատիպ զանգվածային հանդիպում-հանրահավաքներ կազմակերպելու գաղափարից եւ չխաթարել ուսումնական գործընթացը:

NEWS.am-ի թղթակիցը հաղորդում է, որ այսօր էլ մինչեւ ակցիայի սկսվելը ռեկտոր Արա Ավետիսյանը մոտենում էր բակում խումբ-խումբ կանգնած ուսանողներին, հետաքրքրվում, թե ինչ դաս է, ով է դասախոսը եւ հրահանգում գնալ լսարաններ։

Երբ համալսարանի տարածք են եկել «ԴԵՄ ԵՄ» նախաձեռնության անդամները, ռեկտորը մոտեցել է նրանց, հորդորել, որ ակցիա չանեն, քանի որ դա «անբարեխիղճ վերաբեմունք է ուսանողների նկատմամբ»։

Չնայած նախաձեռնությունը ընտրել էր հենց մեծ 12։30-ին սկսվող մեծ դասամիջոցը՝ դասապրոցեսին չխանգարելու համար, ռեկտորը զգուշացրեց, որ կողքի վարժարանում այդ պահին դաս է ընթանում, եւ հույս հայտնեց, որ ակցիայի մասնակիցներն այնքան բարեխիղճ կգտնվեն, որ 12։45-ին կավարտեն ակցիան, որպեսզի ուսանողները վերադառնան լսարաններ։

Թեեւ նա կոչ էր արել դրոշներ չպարզել եւ բարձրախոսով չխոսել, «ԴԵՄ եմ»-ի մասնակիցները ելույթ ունեցան բարձրախոսով, եւ համալսարանի բակում հավաքված մի քանի հարյուր ուսանողներին կոչ արեցին պայքարել իրենց ապագա աշխատավարձերի կրճատման դեմ։

«Դուք այս երկրի ապագան եք, ինքներդ պետք է այնպիսի երկիր կերտեք, որ վաղը դուք եւ ձեր երեխաներն արժանապատից ապրեք»,- հայտարարեց Տիգրան Գրիգորյանը։

Համալսարանի բակում հավաքված ուսանողներն ու դասախոսները ծափահարություններով էին արձագանքում ելույթներին, եւ վանկարկում էին՝ «դեմ եմ»։

Ռեկտորին մնում էր միայն համակերպվել բակում կանգնած հետեւել ակցիային։

Ի դեպ, նա տեղեկացրեց, որ թեւ ինքը դասախոսների աշխատավարձերից 5% պահումներն արել է, բայց հավելավճարներ է տվել։

Ուղիղ 12։45-ին «ԴԵՄ ԵՄ»-ն ավարտեց իր ակցիան, եւ ուսանողները վերադարձան դասական պրոցեսին։