Ֆրանսիական «Le Dauphiné libéré» օրաթերթն անդրադարձել է ֆրանսիական Վիենի եւ Լեռնային Ղարաբաղի Հադրութ քաղաքների միջեւ ստորագրվելիք բարեկամության հռչակագրին:
Վիեն եւ Լեռնային Ղարաբաղի Հադրութ քաղաքների ընտրյալներն այսօր՝ փետրվարի 25-ին կստորագրեն բարեկամության հռչակագիր, որի նպատակն է իրականացնել համատեղ ծրագրեր, մասնավորապես կրթության, մշակույթի, սպորտի, առեւտրի եւ տեղական կառավարման բնագավառներում:
«Մեր հայրենակիցներից շատերը ցեղասպանությունից փրկվածների երեխաներ են: Բնական է, որ նրանք Հադրութի հետ համագործակցության շարժիչ ուժերից մեկը կդառնան, ինչը նրանք արդեն անում են Գորիսի հետ, որի հետ նույնպես մենք քույր քաղաքներ ենք »,-բացատրում է քաղաքապետ Ժակ Ռեմիյեն:
Ժակ Ռեմիյենի խոսքով՝ այս համագործակցությունը նաեւ պետք է նպաստի տարածաշրջանում խաղաղության եւ անվտանգության հաստատմանը: Վերջապես, ֆրանսասեր Լեռնային Ղարաբաղը ցանկանում է ծանոթանալ ֆրանսիական հմտությանը եւ կամենում է տնտեսական հարաբերություններ հիմնել ձեռնարկությունների հետ: «Մեր այս նախաձեռնությունը գործելու նոր հեռանկարներ է ընձեռնելու մեր փոքր եւ միջին ձեռնարկություններին»,-հաստատում է Ժակ Ռեմիյեն:
Նշենք, որ «Le Dauphiné libéré» օրաթերը հիմնվել է 1945 թ-ին եւ լույս է տեսնում 303.000 օրինակով: