2018թ.-ից Հայաստանը Ռուսաստան էլեկտրաէներգիա արտահանելու հնարավորություն կստանա: Այս մասին փետրվարի 26-ի մամուլի ասուլիսում նշել է էներգետիկայի փոխնախարար Իոսիֆ Իսայանը՝ պատասխանելով NEWS.am-ի թղթակցի հարցին:
Նախքան դա, ըստ Իսայանի, գերմանական KfW բանկի վարկով կկառուցվի Հայաստան-Վրաստան էլեկտրահաղորդման գիծ՝ 400 կիլովոլտ լարմամբ, որը Հայաստանի եւ Վրաստանի էներգահամակարգերը զուգահեռ ռեժիմի կբերի, իսկ դրանց միջեւ թողունակությունը կավելանա մինչեւ 250 մլն կՎտ/ժ-ի: Այժմ էներգետիկ հոսքերը տարվում են Թբիլիսիի շրջանում էներգետիկ կղզիների միջոցով:
Երբ երկու համակարգերը սկսեն զուգահեռ աշխատել, Ռուսական էներգահամակարգ դուրս գալու հնարավորություն կստեղծվի, որն այժմ պակասուրդով է աշխատում: Համաժամանակյա աշխատանքային ռեժիմում հնարավոր կլինի էլեկտրաէներգիա արտահանել այնտեղ:
400 կիլովոլտանոց Հայաստան-Վրաստան էլեկտրահաղորդման գծի կառուցման համար գերմանական KfW բանկը 75 մլն եվրոյի վարկ կհատկացնի եւ 2 միլիոնի դրամաշնորհ:
